Турк кино саноатидаги машҳурларнинг ижтимоий тармоқда жойлаштирган сўнгги қизиқарли фотосуратлари ва янгиликлари билан танишамиз.
Томошабинларга “Квест” ва “Истанбуллик келин” сериалларидан, шунингдек, Netflix платформасидаги “Ишончли қўлларда” фильми билан таниш бўлган актриса Асли Энвер 10 ойлик қизи Элай билан тушган янги суратини ижтимоий тармоқдаги обуначилари билан бўлишди.
Асли Энвер 2022 йилнинг ноябрь ойида бизнесмен Беркин Гўкбудак билан турмуш қурди. Тўй режалаштирилмаган эди, улар фарзанди туғилишини кутган ҳолда, расман турмуш қуришга шошилган.
Актриса 38 ёшида биринчи марта она бўлганидан жуда хурсанд. У ижтимоий тармоқларда қизининг суратлари билан мунтазам бўлишиб туради ва оналик бахти ҳақида ўз фикрларини билдиради. 10 ойлик мовий кўзли қизининг янги суратини жойлаган Асли Энвер сурат остига “Кўзларимнинг гули” деб изоҳ қолдирди.
2014 йилда “Юрак ишлари” сериали ҳамда 2018 йилда “Тонг қуши” лойиҳасида иштирок этган актёр Жан Яман Туркияни тарк этиб, фаолиятини Италияда давом эттирмоқда.
Куни кеча Яман 11 миллион обуначиси бўлган фаол Instagram аккаунтини ўчириб ташлади. Бунинг сабаби сифатида актёрнинг карьераси ва обрўсига путур етказаётган тармоқдаги баъзи изоҳлар ва иш вақтида диққатни жамлашга халақит бериши билан изоҳлади. Шунингдек, Instagram’даги салбий фикрлар унинг эмоционал ҳолатига жиддий таъсир қилган.
Актёр Бурак Ямантурк бир кун аввал Истине туманида бўлиб, журналистларнинг саволларига жавоб берди.
Calendar газетаси хабарларига кўра, актёр дўконлар бўйлаб айланиб, қизи Корал учун харидлар қилган:
“Ҳавонинг ҳарорати баланд бўлгани бир оз мени чарчатди, лекин яқинлашиб келаётган байрамда қизимни хурсанд қилишим лозим эди. Уйга, қизим Корал олдига қуруқ қўллар билан қайта олмайман ахир”, — деди актёр журналистларга жавобан.
“Қўлимни қўйиб юборма”, “Севги 101”, “Марашлик” фильмлари билан машҳурликка эришган актриса Алина Боз 6 ой аввал ресторанлар тармоғи директори Умут Эвиргенга турмушга чиқди.
Ҳозирда жуфтлик Бодрумда ҳордиқ чиқармоқда.
Актёр Мурат Йилдирим ҳам қизалоғининг фотосуратларини тез-тез ижтимоий саҳифаларга жойлаб туради. TRT телеканалида намойиш этилган “Разведка” сериалида бош ролни ижро этган Мурат Йилдирим 2016 йилда марокашлик Иман Элбани билан турмуш қурган. 2022 йил октябрь ойида жуфтликнинг узоқ кутилган фарзанди — Мирай исмли қизи дунёга келди.
Журналистларга берган интервьюсида Мурат Йилдирим ўзининг икки ёшли қизи ҳақида ҳам айтиб ўтди:
“Мен ўғил боланинг отаси бўлиш қандай эканлигини билмайман, лекин қиз боланинг отаси бўлиш ажойиб экан. Ота ва унинг қизи ўртасида ажиб бир ришта, гўзал севги бор. У менинг кичик севгим”, — дейди актёр.
Ижодий фаолиятини “Тингла, азизим” ва “Ёмон еттилик” сериалларидаги кичик роллардан бошлаб, “Кичик хоним” сериалида маҳоратини намойиш этган актёр Бариш Ардуч ҳам қизалоқнинг отаси. Ардуч журналистларга берган интервьюсида оталик ҳақидаги ҳис-туйғулари ҳақида сўзлаб берди:
“Эндиликда фарзандим мен учун катта кўзгудир. Унинг юзида бахт ва қувончни кўриш мен учун энг катта мукофот. Шунинг учун ҳозирда менга катта куч ва илҳом берадиган инсон бу менинг қизимдир”.
Calendar Gazette журналисти Дўған Саваш хабар беришича, турк кино саноатининг машҳур жуфтлиги Энгин Ҳепилери ва Бейза Шекержи оилавий бахт сири билан бўлишди: “Биз бир хил кун тартиби ва монотонликдан қочамиз. Эртанги кун учун турфа режалар тузишни яхши кўрамиз”, — дейди юлдузлар.
Актёрлар “Қасос” телесериалини суратга олиш жараёнида танишиб қолган. Сериалдаги муҳаббат ҳақиқий ҳаётга кўчган ва улар тез орада турмуш қуришган. Уларнинг ўғли Жан бошланғич мактабга чиқиш арафасида.
Изоҳ (0)