Америкалик таниқли модель ва тадбиркор Кайли Женнер миллиард долларлаб бойликка эга. Аммо ўзининг улкан капитали ва жамғармаларига қарамай, Кайли қимматбаҳо меҳмонхона ва ресторанларда хизмат ҳақини тўлашдан бош тортади. У “юлдузлик касаллиги”га чалинганми? Йўқ, албатта. Эндиликда Кайли бизнес учун эмас, бизнес Кайли учун ишлайди, чунки у тирик рекламанинг ўзгинаси!
Бир неча кун аввал Женнер Францияда ажойиб таътилни ўтказди ва шаҳарнинг энг нуфузли меҳмонхона ва ресторанларида ҳордиқ чиқарди. Аммо Европага саёҳати давомида юлдуз деярли пул сарфламади, балки мўмай даромад ҳам ишлаб олди. Чунки унга турли компаниялар ўз маҳсулотини реклама қилиши учун катта миқдорда пул тўлаган.
“Кайли Женнер ижтимоий тадбирларга бориши, ҳашаматли ресторанларда тушлик қилиши ва маълум бир заргарлик буюмларини омма олдига тақиб чиқиши учун юқори маош олади. Унга ҳатто реклама қилинувчи тирноқ бўёғини суртгани учун пул тўланган. Гарчи бу саёҳат унга жуда қимматга тушгандек туюлса-да, аслида у тадбиркор сифатида ҳамма нарсадан фойда олишга улгурди”, дейилади хорижий манбаларда.
Барчасига Кайлининг онаси сабабчи, у қизларига ўзининг ҳар бир қадами ва ҳаракатида даромад топишни ўргатган. Кардашьян опа-сингилларнинг онаси, собиқ стюардесса, ҳозирда эса қизларининг продюсери бўлган Крис Женнер ўз оиласини миллионлаб доллар олиб келадиган брендга айлантирган.
Крис Женнер фарзанди Кайли ва бошқа қизларига уларнинг ҳаёти бизнес эканлигини ва даромадларини максимал даражада оширишлари лозимлигини уқтирган.
Изоҳ (0)