74 ёшли модельер Вера Вонг овқатланиш масаласида ўзига ҳеч қандай чегара қўймаслигини ёшлик ва гўзаллик сирларидан бири деб билади.
Вонгнинг айтишича, 2 ҳафта мобайнида ҳар куни McDonald’s егуликларига буюртма бериши, кейин эса маълум муддат танаффус қилиши мумкин. Ижодкор, шунингдек, Dunkin’ Donuts ширинликларини ҳам жуда яхши кўради. Унинг севимли ширинлиги — майда безаклар сепилган пуштиранг, шунингдек, ванилли крем билан тўлдирилган пончикдир.
Модельернинг айтишича, тинимсиз равишда меҳнат қилиш ҳам ёш кўринишга ёрдам беради. “Мен умр бўйи ишладим, шунинг учун ҳам булар ҳақиқатдан бир-бирига боғлиқ эканлигини биламан. Ўйлашимча, иш жараёни доим тетик бўлишимиз ва ёшликни сақлашга ёрдам беради. Меҳнат — саломатлик учун энг яхши дори воситасидир”, — дейди у.
Вонг 2020 йилда ижтимоий тармоқдаги саҳифаси орқали ҳамиша ёш кўринишига “иш, уйқу, севимли коктейллари ва терини қуёшдан ҳимоялаш” ёрдам беришини айтиб ўтганди.
Изоҳ (0)