1996 йил 9 октябрда голландиялик модел Иоланда ван ден Херик ва фаластинлик миллиардер Муҳаммад Ҳадид оиласида Изабелла исмли қиз дунёга келади. Отасининг олдинги турмушидан Мариэл ва Алана исмли фарзандлари бўлган. Иоланда бундан ташқари, ўғли Анвар ва Белла туғилишидан бир йил олдин, ҳозир машҳур моделер бўлган Жижи Ҳадидни дунёга келтирган.
Мазкур никоҳ узоқ давом этмайди: ўғли туғилгандан бир йил ўтгач, эр-хотин ажрашади, кейинчалик Иоланда мусиқачи Девид Фостерга турмушга чиқади. Қизиғи шундаки, продюсер аввалроқ Брюс Женнернинг собиқ севгилиси Линда Томпсон билан оила қурган, кейинчалик у Белла ва Жижининг яқин дугоналарига айланган Кендалл ва Кайли Женнерларнинг отаси бўлади.
Опа-сингил Ҳадидлар ҳашаматда ўсган ва аслзода оила вакиллари сингари от минишни яхши кўришган. Изабелла 2016 йилги Олимпиадада иштирок этишни орзу қилганини таъкидлайди, аммо соғлиғи билан боғлиқ муаммолар унга халақит беради: расмий версияга кўра, бутун оилани кана чаққан, шунинг учун Иоланда ва Анвар Лайма касаллигига (қон сўрувчилар томонидан юқадиган энг кенг тарқалган касаллик) чалинган. Бироқ от спорти бўйича мутахассислар Белланинг халқаро мусобақаларда ғолиб чиқиш имконияти бўлмаганини айтишади.
Янги кўриниш
Ўсмирлик чоғида Белла ортиқча вазндан азият чеккан, у айниқса нозик онаси ва опасини кўрганида тушкунликка тушарди. Айтганча, Жижидан ажралиб туриш учун малла сочли қиз сочларини жигаррангга бўяйди. Аммо унинг ташқи қиёфасини яхшилаш чоралари шу билан тугамайди: Изабелла жуда кўп вазн йўқотади, шунингдек, онасидан ринопластика учун пул беришни сўрайди — 15 ёшли ўсмир қиз отасидан мерос бўлиб қолган катта бурнидан мамнун эмасди.
2014 йилда Белла Нью-Йоркка кўчиб ўтади ва фотография бўйича ўқий бошлайди. Бироқ у камеранинг нариги томонида ишлашга кўпроқ қизиқади. 2015 йилда у Breakthrough Star мукофотига сазовор бўлади, шунингдек, қисқа метражли фильм ва бир нечта клипларда рол ўйнайди.
Подиумдаги муваффақиятлар
Кўп ўтмай, дунёдаги энг йирик брендлар Беллага таклиф ёғдира бошлайди — у доимий равишда подиум ва рекламаларда пайдо бўлди. 2016 йилда қиз First Annual Fashion Los Angeles Awards мукофотини қўлга киритади. Йилнинг энг яхши моделига айланади ва Victoria’s secret билан шартнома тузади. Бир йил ўтгач, Ҳадид Vogue журналининг саккизта миллий версиясининг муқовасида пайдо бўлади ва 6 миллион доллар даромад билан Forbes маълумотларига кўра энг кўп ҳақ тўланадиган 10 та модел қаторига киради.
Ҳадид 2022 йилда муваффақиятли либослар сериясини давом эттириб, мода тимсолига айланди —Versace Vintage яна бир бор супермоделнинг идеал қиёфасини таъкидлади. Kоperni суюқ либоси билан ўтказилган тажрибаси мухлисларни янада ҳайратга солди: подиумда Белланинг яланғоч танасига оқ суюқлик пуркашди ва томошабинлар кўз ўнгида бўёқ матога айланди.
Синган қалб
“Мен эркаклар ичида катта бўлганман. Оилавий даврада, муносабатларда ва бошқа вазиятларда менинг овозим эркакларники каби муҳим эмаслигини ҳис қилардим, — дейди Ҳадид Victoria’s Secret Voices подкастида. — Натижада ўзимни ҳимоя қилиш ва эшитиш учун чегаралар йўқолди”.
Белла атрофидагиларни хафа қилишни хоҳламайди, шунинг учун қиз доимо уни камситиш ёки ҳақорат қилишга журъат этган йигитлардан хафа бўлмайди. Шубҳасиз, Тhе Weeknd билан бўлган романтикада ҳам шу ҳолат содир бўлди: дастлаб Ҳадид раққоса ролини ўйнаган In Тhе Night клипида ва Coachella фестивалида Тhе Weeknd билан бирга чиқди. Кейинчалик севишганлар икки марта ажралишди, бунга сабаб қилиб тиғиз иш жадвалини кўрсатишди.
Миш-мишларга кўра, аслида рэпер доимий равишда моделга хиёнат қилган. Биринчи ажралиш пайтида у Селена Гомез билан ишқий муносабатда бўлади, аммо бир неча ойдан кейин Гомес Жастин Бибернинг ёнига қайтади. Тhе Weeknd Белланинг кечиришига эришади, лекин шу билан уларнинг севги ҳикояси тугайди. Бироқ токсик муносабатларга қарамай, собиқ жуфтлик кейинчалик дўст бўлишга қарор қилади.
2020 йил охирида Ҳадид Жек Николсоннинг набираси Дюк билан ишқий муносабатда бўлиб, қалб жароҳатини даволамоқчи бўлади, аммо бундан ҳеч қандай яхшилик чиқмаслигини тезда англайди. Аммо 2021 йил июль ойида модел арт-директор Марк Калман билан танишади ва жиддий муносабатлар ҳақида ўйлай бошлайди. Тўғри, ўша кузда Белла обуначилари олдида йиғлаб, руҳий саломатлиги билан боғлиқ муаммоларини тан олади.
Бироқ 2022 йилда Париждаги мода ҳафталигида модел ўзининг Марк билан муносабатларини расман тасдиқлайди. Миш-мишларга кўра, Тhе Weeknd билан ажрашгандан сўнг, Белла тушкунликка тушиб, гиёҳвандликка мойил бўлиб қолган. Калман унга психологик травма ва гиёҳвандлик билан курашишда ёрдам берган.
Касалликнинг кучайиши ва янги ажралиш
Бир неча йил олдин Белла Лайма касаллиги аломатлари билан курашаётгани, вақти-вақти билан томчидори олишга мажбур бўлаётгани ва руҳий саломатлигида ҳам муаммолар кузатилаётганини айтганди.
“Мен суяк оғриғи, чарчоқ ва ҳоказолар туфайли бир неча кунлаб ётоқдан тура олмаслик нима эканлигини биламан, — дейди супермодел. — Бундай пайтларда одамлар билан мулоқот қилишни ёки улар атрофида бўлишни хоҳламайман”.
Сўнгги пайтларда касаллик кучайди, аммо бу унинг Маркдан ажралишига сабаб эмасди.
“Улар бир-бирларини жуда яхши кўришарди, лекин ўзлари муносабатларни тўхтатишга қарор қилишди. Белла жуда яхши инсон, лекин шон-шуҳрат босими билан яшайди. Улар ажрашганидан бери ўзига ғамхўрлик қилишга ҳаракат қилмоқда.... Унинг Марк билан ажралиши дўстона кечди ва у ҳар доим шахсий нарсалар ҳақида очиқ гапирадиган одам бўлган”, — дейди инсайдер.
Белла соғлиғига кўпроқ эътибор қаратиш учун карьерасида танаффус қилишга қарор қилди, аммо унга Лайма касаллиги эмас, балки спиртли ичимлик ва гиёҳванд моддалар билан боғлиқ муаммолар туфайли реабилитация керак бўлган, деган миш-мишлар тарқалди. Ҳадиднинг яқинлари бу миш-мишларни қатъий рад этди: Белла гиёҳвандликдан азият чекмаган, балки спиртли ичимликларни истеъмол қилишдан бутунлай воз кечган.
Қийин даврга қарамай, модел тез орада ишига қайтиб, барча қийинчиликларни енгиб ўтишига ишонади.
“Мен яхшиман, ташвишланишга ҳожат йўқ. Мен тақдиримдаги ҳеч нарсани ўзгартирмаган бўлардим. Агар шу ергача келиш учун буларнинг барчасини яна бошдан кечиришим керак бўлса, ҳозир айнан шу дақиқада, барчангиз билан бирга бўлардим. Бу мени бугунги Беллага айлантирди.
Шуни айтишим керакки, агар курашсангиз, ҳамма нарса амалга ошади. Мен кучли бўлишга, ўзимга ва энг яхши нарсаларга ишонаман, шунда қора булутлар тарқала бошлайди. Мен 100 кунлик даволаниш курси, деярли 15 йиллик кўринмас азоб-уқубатлар учун ҳам миннатдорман — барчаси шунга арзийди”, — дейди Белла обуначиларига.
Изоҳ (0)