Moda sanoati doimo butun dunyodagi xotin-qizlarni o‘ziga jalb etib kelgan. “America’s next top model” (Amerikaning navbatdagi top modeli) shousining yuqori reytinglarni egallagani buni tasdiqlaydi.
Albatta, teleshou va mashhur jurnallar sahifalaridagi suratlar super modellarning haqiqiy turmush tarzini aks ettirmaydi. Ko‘plab muvaffaqiyatli modellar o‘z karyerasi davomida modellik sog‘lig‘iga putur yetkazganini va shaxsiy hayotida turli muammolarni keltirib chiqarganini tan oladi. Shunga qaramay, modellik biznesi eng yaxshi haq to‘lanadigan sohalardan biri bo‘lib qolmoqda. Quyida dunyodagi eng katta maosh oladigan super modellar bilan tanishamiz.
Vittoriya Cheretti
Vittoriya Cheretti 17 yildan beri modellik biznesida faoliyat yuritadi, ammo mashhurlik unga faqat 2023-yilda, Leonardo Di Kaprio bilan bo‘lgan munosabati haqidagi xabarlardan keyin nasib etdi. Italiyalik ayol hamkasblaridan farqli o‘laroq, shaxsiy hayoti haqida gapirishni yoqtirmaydi va ijtimoiy tarmoqlarda faqatgina moda ko‘rgazmalaridan fotoreportajlarni joylaydi.
Vittoriya o‘z ishiga mas’uliyat bilan yondashadi va hamma narsaga o‘z mehnati bilan erishganini ochiq aytadi. 2023-yil holatiga ko‘ra, Vittoriyaning umumiy boyligi 3,5 million dollarga baholangan.
Joan Smolls
2023-yilda supermodel Joan Smolls 6,5 million dollar ishlab topdi va yilning eng yuqori daromadga ega modellar ro‘yxatida sakkizinchi o‘rinni egalladi.
“Puerto Rikolik podium yulduzi tengdoshlariga qaraganda ko‘proq moda ko‘rgazmalarida qatnashgan. U Estee Lauder, Moschino kabi boshqa brendlar uchun suratga tushishga ham vaqt topadi”, deb yozadi Forbes nashri. So‘nggi to‘rt yil ichida modelning daromadi 3 million dollarga oshgan.
Bella va Jiji Hadid
2022-yilda Bella Hadid moda olamidan vaqtinchalik g‘oyib bo‘ldi. Modelning Laym kasalligi (buyrak yetishmovchiligi bilan bog‘liq autoimmun kasallik) kuchayib ketdi, shuning uchun u karyerasidan tanaffus olishga majbur bo‘ldi. 2018-yilda Forbes reytingida 8,5 million dollar daromadi bilan Bella Hadid sakkizinchi o‘rinni egalladi. 2023-yil oxirida esa u yana ishga qaytdi va 2024-yil boshida moda jurnallari muqovalarida chiqa boshladi.
Supermodelning katta opasi Jiji Hadid esa modellik sanoatida cho‘qqilarni zabt etishda davom etmoqda. 2023-yilda u 12 million dollar ishlab topdi. Modelning daromadi Maybelline, Tommy Hilfiger va Reebok kabi gigant brendlar bilan hamkorlikdan keladi. Jiji o‘zini singlisi bilan taqqoslamaydi.
“Bella va men butunlay boshqacha uslublarga egamiz, shuning uchun men muvaffaqiyatimizni hech qachon solishtirmayman. Singlim menga doim ilhom beradi va biz bir-birimizdan o‘rganib boramiz”, — dedi supermodel Elle nashriga.
Jizel Byundxen
2007-yilda Jizel Byundxen Victoria’s Secret brendi bilan hamkorlik qilishni to‘xtatdi. Model ushbu kompaniya bilan 90-yillarning oxiridan ishlay boshlagan. “Bir necha yil avval podiumda ichki kiyimda paydo bo‘lish men uchun odatiy hol edi, biroq vaqt o‘tishi bilan bikinida suratga tushayotganimda o‘zimni noqulay his qila boshladim”, deb yozadi u “Anglaganlarim: mazmunli hayot sari” nomli xotira kitobida.
Byundxen moda biznesini tark etgan bo‘lsa-da, u dunyodagi eng ko‘p maosh oluvchi modellardan biri bo‘lib qolmoqda. Jizel 2018-yilda 10 million dollar ishlab topdi va Forbes bo‘yicha eng badavlat modellar ro‘yxatida beshinchi o‘rinni egalladi.
Kara Delevin
2015-yilda Delevin modellik faoliyatini yakunlaganini e’lon qildi. Uning eng sodiq muxlislari ham model podiumga qaytishiga ishonmagan edi, chunki Kara psoriaz kasalligidan aziyat chekardi. Moda haftaliklarida doimiy stressga uchrash va uzoq soatlar davomida suratga tushish ishlari uning teri holatiga yanada salbiy ta’sir qildi. Model ishtirok etgan har bir namoyish uchun qalin qoplamali tonal kremlardan foydalanishga to‘g‘ri keldi.
“Men bilan ishlaydigan odamlar qo‘lqop kiyishar va menga tegib ketishdan qo‘rqar edi, chunki ular kasallik yuqumli deb o‘ylashar edi”, — dedi Kara The Times nashriga bergan intervyusida.
Delevinning 2018-yilda modellik olamiga qaytishi uning karyerasida haqiqiy portlash bo‘ldi va bir yilda daromadi 10 million dollardan oshdi. 2023-yil holatiga ko‘ra, Karaning umumiy boyligi 31 million dollarga baholanmoqda.
Rouzi Hantington-Uaytli
Modelning shaxsiy ichki kiyim brendi va kosmetika mahsulotlari do‘konlari unga 2018-yilda 11,5 million dollar daromad keltirdi va o‘sha yili Rouzi Hantington-Uaytli Forbes reytingida uchinchi o’rinni egalladi. Shu vaqtda model aktyor Jeyson Steytem bilan farzandli bo‘ldi va bir muddatga uning karyerasida tanaffus bo‘ldi. Ammo bularning bari Rouzining yillik daromadiga umuman ta’sir qilmadi.
Kendall Jenner
2018-yilda Kendall Jenner 22,5 million dollar ishlab topdi. Forbes nashri ma’lumotlariga ko‘ra, o‘sha vaqtdagi 23 yoshli modelning daromadi Estee Lauder, Adidas va Calvin Klein brendlari bilan tuzilgan shartnomalar tufayli oshib borgan.
2023-yil holatiga ko’ra, Jenner dunyodagi eng ko‘p maosh oluvchi supermodeldir. Lekin daromadning katta qismi uning model sifatidagi faoliyatidan emasdir. Jennerning asosiy boyligi “Keeping Up With Kardashian’s” shousidagi ishtirokidan to‘plangan.
Izoh (0)