Севимли китобингиз қайси эканлигини айтинг, мен сизга кимлигингизни айтиб бераман. Машҳурларнинг қайси асарларни севиб ўқиши ҳақида маълумот берамиз.
Кит Харингтон — “1984” (Жорж Оруэлл)
Актёр классик асарларни ўқишни яхши кўради. Кит Харингтоннинг севимли китоблари рўйхати ҳар доим Жорж Оруэллнинг “1984” антиутопик китобидан бошланади. Юлдуз адабиётга профессионал нуқтаи назардан ёндашади — ўзи учун сюжет ва образларни синаб кўради. Интервьюларининг бирида Кит асарнинг бош қаҳрамони — Уинстон Смитни ўйнашни орзу қилишини айтади. Балки бу характер унга ўхшагани учунми? Ҳикояда Смит Ҳақиқат вазирлигида ишлайди. У мафкурага қарши чиқмайди, лекин юрагининг тубида атрофидаги дунёга шубҳа билан қарайди.
Oрландo Блум — “Ака-ука Карамазовлар” (Фёдор Достоевский)
Мазкур рус классикаси Oрландо Блумнинг севимли асарига айланди. Актёр Фёдор Достоевскийнинг “Ака-ука Карамазовлар” романини қайта-қайта ўқийди. Бундан Блум мураккаб адабиётни яхши кўриши ва ҳаётга фалсафий назар билан қараши дарҳол аён бўлади. Бу асар эркинлик, одоб-ахлоқ, ҳаёт мазмуни, шунингдек, инсон қалбидаги илоҳий ва шайтоний тамойиллар ўртасидаги кураш мавзуларига бағишланган. Актёр китобни суратга олиш вақтидаги танаффусларда ўқийди.
Бенедикт Камбербетч — “Жавдарзордаги қўриқчи” (Жером Селинжер)
Актёр Жером Селинжернинг “Жавдарзордаги қўриқчи” романини яхши кўради. Балки Бенедикт Камбербетч ўзини ёш қаҳрамон каби исёнчи ҳис қилар? Унда 17 ёшли Холден дунёга назар ташлайди ва ҳақиқатга кескин муносабатда бўлади, замонавий жамиятнинг умумеътироф этилган қонунлари ва ахлоқини қабул қилмайди. Камбербетч муаллифнинг биз улғайган сари ғам-ташвиш дунёсидан ёлғон ва умидсизлик оламига тушиб қоламиз, деган фикрига қўшилади.
“Бу менинг ҳаётимни ўзгартирган китоб”, — дейди Бенедикт интервьюларининг бирида.
Дэниeл Редклифф — “Уста ва Маргарита” (Михаил Булгаков)
Рус классикасининг яна бир мухлиси Дэниел Редклиффдир. Актёр Михаил Булгаковнинг “Уста ва Маргарита” мистик романини яхши кўради — у китобни “Гарри Поттер”да рол ўйнашни бошлаганидан кейин ўқиган. Асар билан улғайган ёшда танишган Дэниел сеҳргарлар, афсунлар ва сирли ўзгаришлар мавзусини ёқтиришига амин эди. Айтганча, Редклифф Москвада бўлганида Булгаковнинг Патриарх кўлидаги уйига ташриф буюриш имкониятини қўлдан бой бермайди. Актёр асар муҳитига тўлиқ сингиб кетган ва севимли қаҳрамони — Бегемот лақабли мушук ролини ўйнашни хоҳлашини айтган.
“Бу китоб тасодифан қўлимга тушиб қолди ва у ҳанузгача энг севимли романим. Мен ақл бовар қилмайдиган севги ва ўзига хос ҳазил туйғуси бор оламга тушиб қолдим”, — дейди актёр.
Селена Гомес — “Бўлмоқ” (Мишел Обама)
Хонанда Мишел Обаманинг “Бўлмоқ” китобини жуда ёқтиришини интервьюларида бир неча бор таъкидлаган. Бу АҚШ собиқ биринчи хонимининг хотира китоби. Эрингиз президент бўлганда ҳаёт қандай ўзгаради; турмуш ўртоғингизнинг карьераси давомида қандай ҳис-туйғуларни бошдан кечирасиз —муаллиф шу ҳақда сўзлаб беради. Аммо Селена Гомесни ўзига тортадиган асосий нарса Мишелнинг ўзини шакллантириш тарихи — оддий қиздан президентнинг ўзига ишонган ва мақсадли рафиқаси, шунингдек, дунёдаги энг нуфузли аёллардан бирига айланди.
Тейлор Свифт — “Юлдузлар айбдор” (Жон Грин)
Тейлор Свифт бўш вақтини китобхонлик билан ўтказади. Хонанда жуда кўп асарларни ўқиган, фақат битта севимли китобни танлаш қийин. Аммо Тейлор бошқаларга қараганда тез-тез эслатиб турадиган бир китоб бор — бу Жон Гриннинг “Юлдузлар айбдор” романи. Свифт учун сюжет кучли ва яхши ёзилган аёл характерига эга бўлиши муҳимдир. Ушбу қаҳрамонлардан бири уни ушбу романда илҳомлантирган.
Айтганча, бир неча йил олдин Тейлор эрта ёшдан ўқишни қўллаб-қувватлаш бўйича бутун дунё бўйлаб кампанияда иштирок этган. Хонанда мактаб ўқувчилари билан уларнинг севимли китобларини муҳокама қилиб, болаларга “Юлдузлар айбдор”ни ҳам тавсия қилади.
“Романнинг бош қаҳрамонига қалбан яқинман. Ҳейзел — мураккаб ва ажойиб персонаж”, — дейди Тейлор.
Жонни Депп — “Йўлда” (Жек Керуак)
Актёр Жек Керуакнинг “Йўлда” романини яхши кўради. Муаллиф Жонни илҳомлантирган 20-аср маданиятини яратишда муҳим рол ўйнаган. Роман бутун бир авлоднинг тақдири ва дардини акс эттиради. Бош қаҳрамон йўлда чексиз саёҳат қиладиган китоб саҳифаларида қандай қизиқарли нарсалар содир бўлиши мумкин?
“Ушбу роман мени ўйлашга ва ўзимда янги фазилатларни кашф этишга мажбур қилади”, — дейди актёр.
Эмма Уотсон — “Кичкина шаҳзода” (Антуан де Сент-Экзюпери)
"Қайта-қайта ўқиладиган яхши китоб" — Антуан де Сент-Экзюперининг “Кичкина шаҳзода” эртаги билан таниш бўлган деярли ҳамма шундай дейди. Эмма Уотсон ҳам худди шундай фикрда. Китоб болаларга ҳам, катталарга ҳам ёқади. Ахир у ҳамма учун муҳим мавзуни кўтаради — қандай қилиб ўзингизда яхши фазилатларни сақлаб қолиш ва барча тирик мавжудотларга миннатдорлик билдира олиш. Эмма бу фалсафий фикрларни қадрлайди.
“Менга ўзида хотиралар сақлайдиган китоблар ёқади. Бу қандайдир бир жойда тасодифан эшитилган таниш қўшиқдек. Худди шу нарса бошқа китобларда ҳам бўлади: китобни ўқий бошлайсиз ва у сизни бошқа жойга ёки бошқа даврга олиб кетади”, — деди Уотсон ёқимли таассуротлар ҳақида.
Изоҳ (0)