Денгиз касаллигидан азият чеккан актёрлар ва ҳақиқий прототипга эга Жек Читтак: «Кариб денгизи қароқчилари» фильми ҳақида ҳайратда қолдирадиган 10 та факт (фото)

Бундан роппа-роса 10 йил олдин «Кариб денгизи қароқчилари: Номаълум соҳилларда» фильми экранларда намойиш этилган ва франшизанинг биринчи қисми ундан ҳам эртароқ – 18 йил аввал пайдо бўлган. Маҳоратли актёр Жонни Депп ижро этган Жек Читтак образи барча замонлар ва халқларнинг асосий денгиз қароқчиси сифатида мухлислар ёдида қолган. Аммо франшиза ҳақида шундай фактлар борки, ҳатто ашаддий мухлислар ҳам бундан бехабар.

Илҳом манбаси

Қароқчилар ҳақида бир нечта фильмлар яратиш ғояси режиссёр Грегор Вербинскида Калифорниядаги кўнгилочар боғда пайдо бўлган. Худди шу номдаги аттракцион у ерда жуда машҳур эди. Боғда меҳмонлар қайиққа ўтириб, боғнинг испан қалъаси кўринишидаги декорация, ўликлар кўрфази, сув парилари соҳили, қамоқхонада вақт ўтказаётган қароқчининг олдидан сузиб ўтади.

Маҳаллий аҳолининг ёрдами

Суратга олиш ишлари Кариб денгизининг 20 хил оролида бўлиб ўтган ва бу жараёнга ҳақиқий маҳаллий аҳоли ҳам жалб қилинган.

Жек Читтак тўқима образ эмас

Албатта, сценарий муаллифлари бош қаҳрамоннинг исмини ўйлаб топган, аммо прототип Жек Рекхем исмли ҳақиқий қароқчи. Режиссёрлар эса ундан бош чаноқ ва суяклари бўлган байроқ тасвирини айнан кўчирган.

Бечора маймун

Капитан Барбоссага хизмат қилган маймун суратга олиш майдончасида қийинчиликларга учради. У сюжетга кўра қўрқувдан титраши учун махсус тебраниш стендига жойлаштирилди, бу, албатта, бечора ҳайвонни жуда қўрқитди.

Актрисанинг дублёр опаси

«Номаълум соҳилларда» фильмини суратга олиш вақтида Анжелика ролини ижро этган Пенелопа Круз ҳомиладор эди. Шунинг учун актриса билан барча ракурсларни тўлиқ суратга олишнинг имкони бўлмаган. Кадрни кесиб бўлмайдиган жойларда эса актрисага жуда ҳам ўхшайдиган опаси Моника дублёр сифатида иштирок этган.

Жонни Деппнинг импровизациялари

Жонни Депп суратга тушишнинг бошиданоқ сценарий ва қаҳрамон образига кўплаб ўзгаришлар киритди. Унинг ўзи қароқчининг мимикаси, юришини ўйлаб топди ва тилла тишлар қўйиш таклифини киритди. Картина продюсерларига актёрнинг импровизациялари унчалик маъқул бўлмади, лекин фильм режиссёри уни қўллаб-қувватлади, шунинг учун Жек Читтак Жоннининг ўзи тасаввур қилганидек намоён бўлди.

Бошқа Жеклар

Қароқчи роли учун кастингда Кристофер Уокен ва Жим Керри ҳам талабгор эди. Аммо ёзувчи ва ҳаммуаллиф Стюарт Битти эса бу ролда Хью Жекманнинг тарафдори бўлган. Бироқ Disney кинокомпанияси Хьюни унчалик машҳур эмас деб ҳисоблади.

45 дақиқалик грим

Интервьюда Кира Найтли ҳар куни эрталаб суратга тушишдан олдин визажист ҳузурида 45 дақиқа вақт ўтказган. Бундан ташқари, суратга олиш майдончасида актриса доимий равишда парик тақиб юрган, чунки «Домино» фильмида суратга тушиш вақтида у сочларини қисқартирган эди.

Денгиз касаллиги

Кўпгина кино актёрлари денгиз касаллигидан азият чекди бу, албатта, суратга олиш жараёнини жуда мураккаблаштирди. Айтганча, биринчи картина океанда суратга олинган. Бунинг сабаби шундаки, продюсерлар илгари «Титаник» фильми суратга олинган энг катта павильондан фойдаланиши керак эди, лекин у аллақачон бошқа суратга олиш ишлари билан банд бўлган.

Шунчаки қароқчилар

Дастлаб, биринчи фильм оддийгина «Кариб денгизи қароқчилари» деб номланиши режалаштирилган эди. Аммо картина муаллифлари экранга чиқишидан анча олдин муваффақиятли фильмлар давомий бўлиши кераклигини англаб, томошабинлар франшизанинг қисмларида чалкашмаслиги учун «Кариб денгизи қароқчилари»га «Қора марвариднинг лаънати» деб қўшди.