Gollivud yulduzi Jonni Depp kapitan Jek Chittak qiyofasida kiyinib, San Sebastyandagi (Ispaniya) Donostiya universiteti kasalxonasida yosh bemorlar holidan xabar oldi. Bu haqda shifoxonaning X tarmog‘idagi sahifasida ma’lum qilindi.
Aktyor bolalar onkologiyasi bo‘limidan tashqariga chiqmaguncha “Karib dengizi qaroqchilari” franshizasida o‘ynagan obrazidan chiqmadi, deyiladi El Diario Vasco nashrida. Jek Chittakning tashrifi bolalarga hech bo‘lmaganda bir necha daqiqaga boshidan kechirayotgan qiyinchiliklarni unutishga yordam berdi, deya qo‘shimcha qildi gazeta.
Avval ham Depp mashhur qaroqchi qiyofasida Vankuver, Parij, London, shuningdek, AQSHning bir qancha shaharlaridagi shifoxonalarning bolalar bo‘limlariga tashrif buyurgan.
Aktyor Jonni Depp oxirgi marta 2017-yilda “Karib dengizi qaroqchilari: murdalar ertak aytmaydi” filmida ishtirok etdi. So‘ng aktrisa Margo Robbi bilan suratga olinishi rejalashtirilgan “Karib dengizi qaroqchilari” filmining yangi spin-offi Disney tomonidan bekor qilindi. Chunki Gollivud aktyori rafiqasi Ember Hyord bilan bog‘liq mojarolar sabab karyerasida muammolarga duch keldi. Aktyorga aynan shu sababli yangi rollar taklif qilinmadi va ishtirok etgan loyihalaridan haydaldi. Depp sudda g‘alaba qozonganidan so‘ng, prodyuserlar va rejissyorlar yana u bilan hamkorlik qilishni so‘radi. Jumladan, Disney Jonniga yana Jek Chittak rolini taklif qildi, biroq u kutilmaganda buni rad etdi.
Foto: Vanity Fair
So‘nggi yillarda Jonni ko‘p vaqtini musiqa va tasviriy san’atga bag‘ishladi. 2019-yilda Hollywood Vampires rok guruhining albomini chiqardi. 2022-yilda u gitarachi Jeff Bek bilan disk yozdi. “18” deb nomlangan ushbu albomning ko‘plab kompozitsiyalarida Jonni Deppning o‘zi solist hisoblanadi. 2023-yilda aktyor “Janna Dyubarri” filmida qirol Lyudovik XV rolida suratga tushdi.
Avvalroq Jonni Depp jajji muxlisini davolab bo‘lmaydigan yurak kasalligiga qarshi kurashishda qo‘llab-quvvatladi va Jek Chittak qiyofasida kiyinib, ta’sirchan videomurojaati va telefon qo‘ng‘irog‘i bilan bemorni hayratda qoldirgan edi.
Izoh (0)