Янгиликларни кузатишдан чарчаган кўплаб томошабинлар “Кариб денгизи”нинг маккор қароқчиси ва “Алиса мўжизалар мамлакатида”ги шляпачининг карьераси ҳақида билади. Шу сабабдан ҳам актёр фаолиятига тўхталмай, Жонни Депп иштирокидаги янги фильмлар ҳақида маълумот берамиз.
“Жанна Дюбарри”
Франция, XVIII аср. Бадавлат ҳомий туфайли оддий қиз Жанна Вобернье таълим олишга муваффақ бўлади. Мафтункор қиз куртизанка (бой ва нуфузли мижозлари бўлган фоҳиша)га айланади ва жамиятнинг юқори қатламига киришга ҳаракат қилади. Улғайган Жанна (Майвенн) Франциядаги энг нуфузли одамлар билан учрашишни бошлайди. Қизнинг доимий мижозларидан бири бўлган граф Гилём Дюбарри (Мельвилль Пупо) у орқали мўмайгина пул ишлашга ва уни кўнгилхушлик қилишни яхши кўрадиган қирол Людовик XV (Депп) билан таништиришга қарор қилади. Монарх бир зумда Жаннага мафтун бўлади ва ўзига маъшуқа қилиб олади. Аммо Версаль аҳлининг ҳаммаси ҳам мамлакат ҳукмдори ёнида фоҳишани кўришдан мамнун бўлмайди.
Тарихий мелодрама бюджети 22 миллион долларни ташкил этди. Фильмни томоша қилишнинг яна бир сабаби — Жонни Деппнинг қизиқарли роли. Собиқ хотини Эмбер Хёрдни судда ютиб чиққан америкалик актёр яна кинога қайтди. Шуни таъкидлаш керакки, Деппни француз қироли ролида кўриш жудаям ғайриоддий. Аммо актёр монарх образига ҳам капитан Жек Читтак ҳийла-найрангларини кирита олди. Людовик XV кундалик маросимлардан чексиз чарчаган, қизларига бееътибор бўлиб қолган ва умуман депрессияга яқин ҳолатда эди. Жанна билан танишув эса монарх дунёсини дарҳол янги рангларга бойитади. Депп эса бу ўзгаришни маҳорат билан кўрсата олган.
“Ғаройиб махлуқлар: Гриндевальд жиноятлари”
АҚШдан Англияга қайтган Ньют Саламандер (Эдди Редмэйн) бемалол саёҳат қилиш ҳуқуқидан маҳрум бўлади. Гриндевальд (Жонни Депп) билан яқинлашиб келаётган уруш шароитида Сеҳргарлик вазирлиги бетарафликка тоқат қилмайди: ҳар бир сеҳргар бир томонни танлаши керак. Альбус Дамблдор (Жуд Лоу) Ньютдан яширинча Кринденс (Эзра Миллер)ни топишни сўрайди — унинг тақдирида келажакдаги қарама-қаршиликнинг мумкин бўлган натижасини кўради. Кўпгина қаҳрамонлар Парижда бўлади, у ерда ҳар куни сеҳрли дунё ва бутун инсоният тақдири ҳал қилинади.
“Шарқий экспрессдаги қотиллик”
Машҳур детектив Эркюль Пуаро (Кеннет Брана) қаерда бўлмасин, мураккаб жиноятларга дуч келади. Бу сафар у машҳур Шарқий экспресс поездида йўлга чиқади, у ерда ёқимсиз америкалик гангстер Эдвард Ратчетт (Депп) билан учрашади. У катта сумма эвазига детективдан уни ҳимоя қилишини сўрайди — гангстер антиквар буюмлар савдоси билан шуғулланади, шунинг учун кўплаб душманлар орттирган. Кечаси савдогар шафқатсизларча ўлдирилади: танасига 12 марта пичоқ урилган. Поезддаги барча йўловчилар гумон остида. Ким айбдор? Бахтсиз бева аёлми, хотиржам мураббиями, ҳукми олий княгинями ёки сирли миссионер аёлми?
“Буюк”
1970 йиллар. Минамата кўрфази яқинидаги Япония қишлоғида экологик фалокат юз беради: йирик саноат компанияси ўн йиллар давомида таркибида симоб бўлган кимёвий моддаларни сувга оқизиб келмоқда. Аҳоли умидини узган. Одатий балиқли рацион фожиага айланади, болалар даҳшатли патологиялар билан туғилади: суяклар эгри, заиф кўриш қобилияти ва соқовлик. Океаннинг нариги томонида машҳур ҳарбий фотограф Евгений Смит (Жонни Депп) ўз ҳаётини давом эттирмоқда: унинг спиртли ичимликлар билан боғлиқ жиддий муаммолари бор, фарзандлари у билан мулоқот қилишни тўхтатган, Life журнали эса унинг истиқболига унчалик ишонмайди. Аммо ўлим ёқасидаги одамларнинг тақдири унинг қўлида.
“Ёлғонлар шаҳри”
Ҳип-ҳоп афсонаси Тупак Шакур ва рэпер The Notorious B.I.G. нинг ўлдирилиши — детектив Расселл Пулга (Депп) тинчлик бермайди. Ишдан шармандаларча ҳайдалган собиқ полициячи жиноий тўда ёки реп гуруҳлари ўртасидаги илгари содир бўлган урушни шунчаки кўзбўямачилик деб ҳисоблайди ва бу ишда Лос-Анжелес полициясининг ҳам қўли бор деб шубҳаланади. Ўз касбидан ҳафсаласи пир бўлган, ҳамкасблари ва жамоатчиликка тергов қандай бўлиши ҳақида эслатиб қўймоқчи бўлган бош қаҳрамон журналист Жексон (Форест Уитакер) билан биргаликда икки қотиллик бўйича барча фактларни тартибга солишга ҳаракат қилмоқда.
“Ёлғонлар шаҳри” ҳақиқий воқеаларга ва Расселл Пулдан интервью олган мухбир Рендалл Салливаннинг китобига асосланган. Иш ёпилган бўлса-да, жиноят ҳали ҳам очилмаган. Миш-мишларга кўра, фильмнинг экранларга чиқишига Лос-Анжелес полицияси тўсқинлик қилган.
“Варварларни кутиш”
Империянинг жанубий чегарасида жойлашган кичик қалъа. Губернатор ёки магистрат (Марк Райлэнс) маҳаллий аҳоли ҳаётига аралашмайди ва шаҳарчада тартиб ўрнатишни зўрға амаллайди. Кутилмаганда штатнинг гуллаб-яшнашига халақит берадиган ваҳшийлар ҳисобланган маҳаллий халқнинг яқинлашиб келаётган ҳужуми ҳақидаги миш-мишлар олий ҳокимият органларига етиб боради. Полковник Жолл (Депп) чегарани тартибсизликлардан ҳимоя қилишга чақирилади. У фақат икки усулдан фойдаланади: қийноқлар ва янги асирларни қўлга олиш. Бундай шароитларда асоссиз миш-мишлар ҳақиқатга яқинлашади.
“Машаққатлар билан”
Коллеж профессори Ричард Браун (Депп) даволаб бўлмайдиган касалликка чалинганини билиб қолади. Ташхис натижаси ёмон эди: яшаш учун сабаб қолмаган, лекин қаҳрамон айнан шуни кутаётганга ўхшайди. Кўлда сузиш, чекиш ва ичиш мажбурий бўлган талабалар учун муаллифлик курси, эркин шахсий ҳаёт — қоидаларнинг энди нима кераги бор? Талабалар эса кенгроқ фикр юритса яхши бўларди, чунки ҳамманинг фақат битта ҳаёти бор.
Бутун фильм ўзига хос тажрибага айланади, унда ҳамма воқеалар бир киши атрофида жамланади. Мазкур лойиҳа Жонни Деппнинг актёрлиги ва фикрларининг эркин парвози учун яратилган. Ўта қоронғи мавзуга асосланган комедия ва драманинг провокацион аралашмаси ўз мухлисларини топди ва томошабинларни ҳайратда қолдира олди.
Изоҳ (0)