ЎзЛиДеП президентлик сайловида Шавкат Мирзиёев номзодини тавсия қилди

Ўзбекистон Президенти сайловида тадбиркорлар ва ишбилармонлар ҳаракати – Ўзбекистон Либерал-демократик партияси томонидан мамлакатнинг амалдаги раҳбари Шавкат Мирзиёев номзод сифатида иштирок этади. Бу ҳақда 7 август, шанба куни ЎзЛиДеП марказий кенгашининг навбатдан ташқари пленумида маълум қилинди, дея хабар бермоқда «Дарё» мухбири.

Маълумот учун, Шавкат Мирзиёев 1957 йил 24 июлда Жиззах вилоятининг Зомин туманида туғилган. 1981 йили Тошкент ирригация ва қишлоқ хўжалигини механизациялаш муҳандислари институтини тугатган. Техника фанлари номзоди, доцент.

Меҳнат фаолиятини 1981 йилда Тошкент ирригация ва қишлоқ хўжалигини механизациялаш муҳандислари институтида бошлаб, кичик илмий ходим, катта ўқитувчи, доцент, ўқув ишлари бўйича проректор лавозимларида ишлаган. 1990 йили Республика Олий Совети депутатлигига сайланиб, айни вақтда Мандат комиссиясининг раиси сифатида ҳам фаолият кўрсатган.

1992 йилда Тошкент шаҳрининг Мирзо Улуғбек тумани ҳокими лавозимига тайинланган. 1996–2001 йилларда Жиззах вилояти ҳокими, 2001–2003 йиллар мобайнида Самарқанд вилояти ҳокими лавозимларида ишлаган. Ижро ҳокимиятидаги фаолияти билан бир пайтда 1995–2003 йилларда Олий Мажлис депутати бўлган.

Шавкат Мирзиёев 2003 йилда Ўзбекистон бош вазири этиб тасдиқланган ва ушбу лавозимга яна уч марта – 2005-, 2010-, 2015 йилларда Олий Мажлис палаталари томонидан қайта тасдиқланган.

2016 йил 8 сентябрь куни Олий Мажлис Қонунчилик палатаси ва Сенатнинг қўшма мажлисида парламент палаталарининг қўшма қарорига мувофиқ, Ўзбекистон Президентининг вазифа ва ваколатларини бажариш вақтинча Ўзбекистон бош вазири Шавкат Мирзиёев зиммасига юкланган.

2016 йил 19 октябрь куни Тошкентда ЎзЛиДеПнинг VIII съезди бўлиб ўтган. Унда партия сиёсий кенгаши аъзоси Шавкат Мирзиёев номзодини Президентликка тасдиқлаш тўғрисидаги қарор қабул қилинган. 2016 йил 4 декабрь куни бўлиб ўтган Президент сайлови якунлари бўйича сайловчиларнинг 88,61 фоиз овози билан Ўзбекистон Президенти этиб сайланган.

2016 йилнинг 13 декабрь куни Олий Мажлис Сенати Шавкат Мирзиёевни бош вазир лавозимидан озод қилган. 2016 йил 14 декабрдан эса Президент сифатида расман ўз вазифасини бажаришга киришган.

Шавкат Мирзиёев «Меҳнат шуҳрати» ва «Фидокорона хизматлари учун» орденлари билан тақдирланган.

Қонунчиликка кўра, партия юқори органи унинг номзодини маъқуллаши, Республикадаги жами сайловчиларнинг камида 1 фоизи номзодни қўллаб-қувватлаб имзо қўйиши керак бўлади.

Ўзбекистон Президенти сайлови кампаниясига 23 июль куни старт берилди. Мазкур сайловларда 5 та партия – «Адолат» СДП, «Миллий тикланиш» ДП, ЎзЛиДеП, ХДП ва Ўзбекистон Экологик партияси ўз номзодини илгари суриш ҳуқуқига эга.

Президент сайлови 24 октябрь куни ўтказилади. Сайловга жами 300 миллиард сўм, ҳар бир номзодга эса 3 миллиард сўмдан ажратилади.