Фарғона вилояти Сўх туманига 6 август куни қўшни Қирғизистондан яна сел келгани тўғрисида хабар берилганди. ФВВ матбуот хизматининг маълум қилишича, сел оқимлари Боткен вилояти Қадамжой туманидаги тоғ ва адир ҳудудларида кучли ёмғир ёғиши оқибатида ҳосил бўлган.
Маълум қилинишича, Фарғона вилояти Сўх туманида жойлашган «Навобод» МФЙ ҳудудидаги «Малбут», «Девайрон-Умбара», «Қалача», «Тул» ва «Полохона» сел йўлларидан 30 метр куб миқдорида сел оқимлари ўтган.
Сел ўтиши оқибатида Сўх тумани ҳудудидан ўтувчи Сўх—Риштон автомобиль йўлининг 80 метр қисми лой аралаш шағалга тўлиб қолган. Малбут қишлоғи хўжалик экин майдонларига ҳамда «Умбара» (15 та хонадон) ва «Девайрон» МФЙ (25 та хонадон) ҳудудларидаги жами 40 та хўжалик томорқалари, қўшимча бино ва уйларнинг ертўлаларига сув кирган.
Сел оқибатларини бартараф этиш мақсадида туман ҳокимиятида ФВБ, ИИБ, прокуратура органлари, ССБ раҳбарияти таркибидан иборат тезкор штаб ташкил этилиб, сел оқибатларини бартараф этиш ишлари амалга оширилган.
Таъкидланишича, сел тошқинлари оқибатида жабрланган ва ҳалок бўлганлар йўқ.
Эслатиб ўтамиз, 4 август куни Фарғона вилояти Сўх тумани «Ҳушёр» сел ўзанига қўшни Қирғизистондан сел келганди. Оқибатда тумандаги ички йўлни бир-бири билан боғлайдиган кўприкка зарар етганди.
«Ўзгидромет» маълумотларига кўра, республиканинг тоғолди ва тоғли ҳудудларида сел келиши хавфи 6—8 август кунлари ҳам сақланиб қолади.
Изоҳ (0)