2021-yilning oktabrida bo‘lib o‘tadigan O‘zbekiston Prezidentlik saylovida “Adolat” sotsial-demokratik partiyasi tomonidan partiya siyosiy kengashi raisi Bahrom Abduhalimov nomzod sifatida ishtirok etadi. Bu haqda 5-avgust, payshanba kuni “Adolat” SDP markaziy kengashining navbatdan tashqari pleniumida ma’lum qilindi, deya xabar bermoqda “Daryo” muxbiri.
Foto: “Daryo” / Madina Nurman
Plenumda keng jamoatchilik ichiga chuqur kirib borish, fuqarolarning siyosiy va huquqiy savodxonligini yanada oshirish, elektorat manfaatlarini himoya qilishga faolroq kirishish, saylovlarda yuqori siyosiy saviya bilan ishtirok etish kabi muhim masalalarga e’tibor qaratildi. Mazkur masalalarni hal etishni o‘z zimmasiga olgan holda partiyaning mazkur saylovda qatnashishi to‘g‘risida plenium qarori qabul qilindi.
Ma’lumot uchun, Bahrom Abduhalimov 1959-yil 27-fevralda Toshkent shahrida tavallud topgan. Toshkent davlat universitetini tamomlagan (1981-yil). O‘zbekiston Fanlar akademiyasi Sharqshunoslik institutida kichik, katta ilmiy xodim, bo‘lim boshlig‘i, ilmiy kotib, ilmiy ishlar bo‘yicha direktor o‘rinbosari, direktor, O‘zbekiston Prezidenti davlat maslahatchisi lavozimlarida ishlagan. Tarix fanlari doktori, Markaziy Osiyo tarixi va sharqshunoslik sohasidagi olim.
U 2011—2020-yillarda Fanlar akademiyasi vitse-prezidenti lavozimida ishlagan. 2020-yilning oktabrida “Adolat” SDP siyosiy kengashi raisi etib saylangan.
Qonunchilikka ko‘ra, partiya yuqori organi uning nomzodini ma’qullashi, Respublikadagi jami saylovchilarning kamida 1 foizi nomzodni qo‘llab-quvvatlab imzo qo‘yishi kerak bo‘ladi.
O‘zbekiston Prezidenti saylovi kampaniyasiga 23-iyul kuni start berildi. Mazkur saylovlarda 5 ta partiya – “Adolat” SDP, “Milliy tiklanish” DP, O‘zLiDeP, XDP va O‘zbekiston Ekologik partiyasi o‘z nomzodini ilgari surish huquqiga ega.
Avvalroq O‘zbekiston prezidentlik saylovida Ekopartiya tomonidan partiya markaziy kengashi ijroiya qo‘mitasi raisi Narzullo Oblomurodov nomzod sifatida qatnashishi ma’lum bo‘lgandi. “Adolat” SDP 2021-yilgi prezidentlik saylovida ikkinchi bo‘lib o‘z nomzodini ko‘rsatdi.
Prezident saylovi 24-oktabr kuni o‘tkaziladi. Saylovga jami 300 milliard so‘m, har bir nomzodga esa 3 milliard so‘mdan ajratiladi.
