ХДП томонидан Мақсуда Ворисова номзоди Президент сайловида иштирок этиш учун тавсия этилди

Ўзбекистон Президентлик сайловида Халқ демократик партияси томонидан Мақсуда Ворисова номзод сифатида қатнашади. Бу ҳақда 7 август куни ХДП марказий кенгашининг навбатдан ташқари пленумида маълум қилинди, дея хабар бермоқда «Дарё» мухбири.

Максуда Ворисова Республикаси Олий Мажлиси Қонунчилик палатасининг Фуқароларнинг соғлиғини сақлаш масалалари қўмитаси раисининг ўринбосари ҳисобланади.

У 1961 йил Тошкент шаҳрида туғилган. Тошкент давлат тиббиёт институтини тамомлаган, мутахассислиги бўйича шифокор. 2018 йилда I даражали «Соғлом авлод учун» ордени билан муокофотланган.

Қонунчиликка кўра, партия юқори органи унинг номзодини маъқуллаши, Республикадаги жами сайловчиларнинг камида 1 фоизи номзодни қўллаб-қувватлаб имзо қўйиши керак бўлади.

Ўзбекистон Президенти сайлови кампаниясига 23 июль куни старт берилган. Мазкур сайловларда 5 та партия – «Адолат» СДП, «Миллий тикланиш» ДП, ЎзЛиДеП, ХДП ва Ўзбекистон Экологик партияси ўз номзодини илгари суриш ҳуқуқига эга. Ҳозиргача Ўзбекистон Президентлик сайловида иштирок этиш учун Экопартиядан партия раиси Нарзулло Обломуродов, «Адолат» СДПдан партия етакчиси Баҳром Абдуҳалимов ва МТДПдан эса партия раиси Алишер Қодиров номзоди илгари сурилди.

Маълумот учун, Ўзбекистон Президентлиги учун сайлов 24 октябрь куни ўтказилади. Сайлов жараёнларига 300 миллиард сўм ва шундан ҳар бир номзодга 3 миллиард сўмдан пул маблағи ажратилиши белгилаб қўйилган.