Бош прокуратура ҳузуридаги Иқтисодий жиноятларга қарши курашиш департаменти Андижон ва Хоразм вилоятларида пул эвазига абитуриентларни ўқишга киритиб қўйишни ваъда қилган институт ҳисобчиси ва талаба ушланганини маълум қилди.
Департаментнинг Андижон шаҳар бўлими томонидан вилоят ДХХ билан ҳамкорликда ўтказилган тезкор тадбирда Андижон давлат тиббиёт институти ҳисобчиси М.А. абитуриент Д.нинг ишончига кириб, уни юқори лавозимда ишловчи танишлари орқали институтнинг «Педиатрия иши» йўналишига ўқишга киритиб қўйиш эвазига 10 минг доллар билан бирга фуқаролик паспорти нусхаси ва абитуриент варақчасини олган вақтида ашёвий далиллар билан ушланган.
Департаментнинг Хоразм вилоят бошқармаси томонидан ўтказилган тезкор тадбирда эса Урганч давлат университети талабаси М.М. фуқаро С.ни ушбу университетнинг тарих факультетига университетда ишловчи танишлари орқали ўқишга киритиб қўйиш эвазига 5000 долларни фуқаро О. орқали олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Бундан аввал Андижонда фуқаронинг ўқишини 1500 доллар эвазига Ўшдан Наманганга кўчириб беришни ваъда қилган талаба қўлга олинганди. Шунингдек, Самарқанд ва Қашқадарёда пул эвазига ўқишга киритиб қўйишни ваъда қилган шахслар ушлангани, Сурхондарё ва Фарғонада фуқароларни ўқишга киритиб қўйиш эвазига пул сўраган талабалар қўлга тушгани ҳақида хабар берилганди.
Изоҳ (0)