Оҳангарон шаҳрида пандемия шароитида талаб юқори бўлган дори воситалари қиммат нархларда сотилишининг олди олинди, дея хабар қилмоқда Бош прокуратура ҳузуридаги департамент матбуот хизмати.
Департамент ҳамда ДБҚнинг Тошкент вилояти бошқармалари томонидан Оҳангарон шаҳрида ўтказилган тезкор тадбирда фуқаролар С.А. ва Д.Х. пандемия шароитида аҳолининг истеъмол талаби юқори бўлган дори воситаларини қиммат нархларда ўтказиш орқали даромад орттиришни кўзлаб, хорижда ишлаб чиқарилган 7 хил турдаги, жами 2 098 қути «Гепарин», «Эноксапарин», «Сефтраксон», «Фавипиравир», «Ремдесивир», «Бактеразон» ва «Дексаметазон» номли дори воситаларини харидорга 160 миллион сўмга сотган вақтида ашёвий далиллар билан ушланган.
Баҳолаш экспертизаси хулосасига кўра, ушбу дори воситаларининг умумий нархи 80,3 миллион сўмни ташкил этган.
Мазкур ҳолат юзасидан Жиноят кодексининг 186-3-моддаси (дори воситаларини дорихоналардан ва уларнинг филиалларидан ташқарида реализация қилиш) билан жиноят иши қўзғатилиб, тергов ҳаракатлари ўтказилмоқда.
Бундан аввал Самарқандда жами 3 минг долларлик кучли таъсир қилувчи дори воситаларини сотаётган шахслар ушлангани, Чилонзорда тадбиркорнинг 763 млн сўмлик тиббий буюм ва дориларини талон-торож қилган омбор мудири ва ҳайдовчисига жиноий иш очилгани ҳамда Тошкент вилоятида 120 миллион сўмлик дорини ноқонуний равишда муомалага киритаётган шахс ушлангани ҳақида хабар берилганди.
Изоҳ (0)