Deputatlar O‘zbekiston Prezidenti saylovini dekabrdan oktabrga ko‘chirish to‘g‘risidagi qonunni qabul qildi

Oliy Majlis Qonunchilik palatasi deputatlari 29-yanvar, juma kuni bo‘lib o‘tgan yig‘ilishda saylov qonunchiligi takomillashtirilishi munosabati bilan ayrim qonun hujjatlariga o‘zgartish va qo‘shimchalar kiritish to‘g‘risida qonunni qabul qildi, deb xabar beradi “Gazeta.uz”.

Kiritilayotgan o‘zgartirishlar to‘g‘risida 25-yanvar kuni ma’lum bo‘lgandi. Shu kuniyoq deputatlar taklifi bilan loyiha jamoatchilik muhokamasi uchun joylashtirildi. Parlament matbuot xizmatining ma’lum qilishicha, saylovlar to‘g‘risidagi qonunchilikka o‘zgartirish kiritish qonun loyihasi e’lon qilinganidan so‘ng 4 kun ichida 206 ta taklif kelib tushgan.

Qonundagi bandlardan biri bilan Prezident, Qonunchilik palatasi, Qoraqalpog‘iston Jo‘rqorg‘i Kengesi, shuningdek, viloyatlar, tumanlar va shaharlar davlat hokimiyati vakillik organlari uchun o‘tkaziladigan saylovlar sanasi dekabr oyining uchinchi o‘n kunligining birinchi yakshanbasidan oktabr oyining uchinchi o‘n kunligining birinchi yakshanbasiga ko‘chirildi (2021-yilda ushbu sana 24-oktabrga to‘g‘ri kelmoqda).

Qonunchilik palatasining ta’kidlashicha, yil oxirida saylovlarning o‘tkazilishi “saylovdan keyingi siyosiy tadbirlarning, xususan, Davlat dasturining qabul qilinishining kechikishiga olib keladi”.

Shu bilan birga, xorijda istiqomat qilayotgan O‘zbekiston fuqarolarini diplomatik vakolatxonalarning konsullik hisobida bo‘lishi yoki bo‘lmasligidan qat’i nazar saylovchilar ro‘yxatiga kiritish tartibi, shuningdek, chet davlatlarda saylovchilar yashayotgan yoki ishlayotgan joyida ko‘chma qutilarda ovoz berishning huquqiy asoslari yaratilmoqda.

29-yanvarda Qonunchilik palatasi majlisida qonun qabul qilinib, Senatga yuborilishi belgilangan.