O‘zbekiston Prezidenti saylovi kampaniyasiga start berildi

Markaziy saylov komissiyasining 23-iyul, juma kuni bo‘lib o‘tgan navbatdagi yig‘ilishida O‘zbekiston Prezidenti saylovi kampaniyasiga start berildi. Bu haqda “Daryo” muxbiri xabar qilmoqda.

Tadbirda tegishli qaror qabul qilinib, saylov kuni etib 24-oktabr sanasi belgilandi.

Markaziy saylov komissiyasi raisi Zayniddin Nizomxo‘jayevning qayd etishicha, saylov kampaniyasi 23-iyuldan boshlanadi.

Mazkur saylovlarda 5 ta partiya – “Adolat” SDP, “Milliy tiklanish” DP, O‘zLiDeP, XDP va O‘zbekiston Ekologik partiyasi o‘z nomzodini ilgari surish huquqiga ega.

Eslatib o‘tamiz, bundan avval O‘zbekiston Prezidenti matbuot kotibi Sherzod Asadov saylovga tayyorgarlik jarayoni allaqachon boshlanganini aytgan, O‘zbekiston YeXHTning Demokratik institutlarining inson huquqlari bo‘yicha byurosi missiyasini bir necha bor qabul qilgani, saylovni jahon standartlari, xususan, YeXHT standartlari bo‘yicha olib borishga tayyorgarlik ko‘rilayotganini qayd etgan. Shuningdek, O‘zbekistonda prezident sayloviga jami 300 mlrd so‘m, har bir nomzodga esa 3 mlrd so‘mdan ajratilishi  hamda O‘zbekistonda “Haqiqat va taraqqiyot” sotsial-demokratik partiyasini davlat ro‘yxatidan o‘tkazish rad etilgani haqida xabar berilgandi.