O‘zLiDeP prezidentlik saylovida Shavkat Mirziyoyev nomzodini tavsiya qildi

O‘zbekiston Prezidenti saylovida tadbirkorlar va ishbilarmonlar harakati – O‘zbekiston Liberal-demokratik partiyasi tomonidan mamlakatning amaldagi rahbari Shavkat Mirziyoyev nomzod sifatida ishtirok etadi. Bu haqda 7-avgust, shanba kuni O‘zLiDeP markaziy kengashining navbatdan tashqari plenumida ma’lum qilindi, deya xabar bermoqda “Daryo” muxbiri.

Ma’lumot uchun, Shavkat Mirziyoyev 1957-yil 24-iyulda Jizzax viloyatining Zomin tumanida tug‘ilgan. 1981-yili Toshkent irrigatsiya va qishloq xo‘jaligini mexanizatsiyalash muhandislari institutini tugatgan. Texnika fanlari nomzodi, dotsent.

Mehnat faoliyatini 1981-yilda Toshkent irrigatsiya va qishloq xo‘jaligini mexanizatsiyalash muhandislari institutida boshlab, kichik ilmiy xodim, katta o‘qituvchi, dotsent, o‘quv ishlari bo‘yicha prorektor lavozimlarida ishlagan. 1990-yili Respublika Oliy Soveti deputatligiga saylanib, ayni vaqtda Mandat komissiyasining raisi sifatida ham faoliyat ko‘rsatgan.

1992-yilda Toshkent shahrining Mirzo Ulug‘bek tumani hokimi lavozimiga tayinlangan. 1996–2001-yillarda Jizzax viloyati hokimi, 2001–2003-yillar mobaynida Samarqand viloyati hokimi lavozimlarida ishlagan. Ijro hokimiyatidagi faoliyati bilan bir paytda 1995–2003-yillarda Oliy Majlis deputati bo‘lgan.

Shavkat Mirziyoyev 2003-yilda O‘zbekiston bosh vaziri etib tasdiqlangan va ushbu lavozimga yana uch marta – 2005-, 2010-, 2015-yillarda Oliy Majlis palatalari tomonidan qayta tasdiqlangan.

2016-yil 8-sentabr kuni Oliy Majlis Qonunchilik palatasi va Senatning qo‘shma majlisida parlament palatalarining qo‘shma qaroriga muvofiq, O‘zbekiston Prezidentining vazifa va vakolatlarini bajarish vaqtincha O‘zbekiston bosh vaziri Shavkat Mirziyoyev zimmasiga yuklangan.

2016-yil 19-oktabr kuni Toshkentda O‘zLiDePning VIII syezdi bo‘lib o‘tgan. Unda partiya siyosiy kengashi a’zosi Shavkat Mirziyoyev nomzodini Prezidentlikka tasdiqlash to‘g‘risidagi qaror qabul qilingan. 2016-yil 4-dekabr kuni bo‘lib o‘tgan Prezident saylovi yakunlari bo‘yicha saylovchilarning 88,61 foiz ovozi bilan O‘zbekiston Prezidenti etib saylangan.

2016-yilning 13-dekabr kuni Oliy Majlis Senati Shavkat Mirziyoyevni bosh vazir lavozimidan ozod qilgan. 2016-yil 14-dekabrdan esa Prezident sifatida rasman o‘z vazifasini bajarishga kirishgan.

Shavkat Mirziyoyev “Mehnat shuhrati” va “Fidokorona xizmatlari uchun” ordenlari bilan taqdirlangan.

Qonunchilikka ko‘ra, partiya yuqori organi uning nomzodini ma’qullashi, Respublikadagi jami saylovchilarning kamida 1 foizi nomzodni qo‘llab-quvvatlab imzo qo‘yishi kerak bo‘ladi.

O‘zbekiston Prezidenti saylovi kampaniyasiga 23-iyul kuni start berildi. Mazkur saylovlarda 5 ta partiya – “Adolat” SDP, “Milliy tiklanish” DP, O‘zLiDeP, XDP va O‘zbekiston Ekologik partiyasi o‘z nomzodini ilgari surish huquqiga ega.

Prezident saylovi 24-oktabr kuni o‘tkaziladi. Saylovga jami 300 milliard so‘m, har bir nomzodga esa 3 milliard so‘mdan ajratiladi.