«Толибон» билан тўқнашувлардан кейин чекинган 1000 дан ортиқ афғонистонлик ҳарбийларни Тожикистон чегарачилари ўз мамлакатига киритди. Бу ҳақда Тожикистон чегара хизматига асосланиб, «Ховар» агентлиги хабар берди.
«‘Толибон’ билан қуролли тўқнашув пайтида 1037 нафар афғон ҳарбий хизматчилари ўз ҳаётини сақлаб қолиш учун чегара орқали ортга чекинди», — дейилган хабарда.
Афғонистонликлар Тожикистон билан чегара чизиғи бўйлаб турли нуқталарда чегарани кесиб ўтган. Аксарият ҳарбийлар Хоруғ шаҳри яқинидаги чегара постини (312 киши), шунингдек, Дарвоз вилоятидаги чизиқни (213 киши) кесиб ўтган.
Чегара хизмати Афғонистон ҳарбийлари Тожикистон ҳудудига яхши қўшничилик муносабатлари ҳамда мамлакат ички ишларига аралашмаслик нуқтаи назаридан киритилганини қўшимча қилди.
АҚШ бошчилигидаги НАТО давлатлари ўз қўшинларини Афғонистондан олиб чиқишни бошлагач, мамлакатда «Толибон» ҳаракати ҳукумат кучларига қарши оммавий ҳужум бошлади. Сўнгги 20 йилдаги бошқа даврларга қараганда «Толибон» ҳозир мамлакатнинг кўпроқ ҳудудларини — тахминан, 40 фоизини назоратга олган. «Толибон»нинг хатти-ҳаракатларига жавобан Афғонистон миллий сафарбарлик эълон қилиб, кўнгиллиларга қурол тарқатишни бошлади.
23 июнь куни 130 дан ортиқ афғон ҳарбийлари «Толибон» билан жанглардан кейин Тожикистон чегарасини босиб ўтди. Ўшанда чекинганлар орасида тўрт нафар ярадор бўлган, улардан бири кейинроқ вафот этган.
Шунингдек, 3 июль куни «Толибон» билан тўқнашувдан кейин 300 дан ортиқ афғонистонлик ҳарбийлар Тожикистонга чекинган.
Аввалроқ «Толибон» Афғонистоннинг Тожикистон билан чегарадаги ҳудудини эгаллаб олгани ҳамда тожик—афғон чегарасидаги вазият кескин деб баҳоланаётгани ҳақида хабар берилганди. Кейинроқ Афғонистонда ҳукумат қўшинлари «Толибон» жангариларини мамлакат шимолидаги бир нечта туманлардан сиқиб чиқаргани маълум бўлди. АҚШ давлат котиби Энтони Блинкен Афғонистондан АҚШ қўшинлари чиқариб кетилгач, мамлакатда ҳокимият тепасига «Толибон» жангарилари келиши мумкинлигини истисно қилмаганди.
Афғонистондан НАТО қўшинларини олиб чиқиш 29 апрелда бошланган, АҚШ ва «Толибон» ўртасида тузилган келишувга биноан жараён кузда якунланиши керак. Бугунга қадар Германия ва Италия Афғонистондан ўз қўшинларини олиб чиқишни якунлади.
Изоҳ (0)