AQSh Afg‘onistondan o‘z harbiylarini olib chiqib ketish jarayonini avgust oxiriga qadar yakunlashga umid qilmoqda. Bu haqda Oq uy matbuot kotibi Jen Psakiga tayanib, “TASS” xabar berdi.
“Hozirda biz bu jarayonni (qo‘shinlarni olib chiqish) avgust oxiriga qadar yakunlanishini kutmoqdamiz. AQSh prezidenti Jo Bayden Amerika qo‘shinlarini Afg‘onistondan olib chiqib ketishga va u yerda 20 yil avval boshlangan urushni tugatishga qaror qilgan”, — dedi u.
Matbuot kotibi AQSh qo‘shinlarining Bagram aviabazini tark etayotgani haqidagi xabarlar borligini tasdiqladi va bu haqda Pentagon rahbari bayonot berishini ta’kidladi. “Ammo vaqt masalasiga kelsak, biz avgust oxirigacha harbiylarni olib chiqib ketishni kutmoqdamiz”, — qo‘shimcha qildi Psaki.
Undan AQSh o‘zi bilan hamkorlik qilayotgan afg‘onlarni Markaziy Osiyo mamlakatlariga vaqtincha joylashtirmoqchi ekani haqidagi xabarlarga izoh so‘raldi. “Bunday muzokaralar haqida xabarlar bo‘ldi, men birorta suhbatni tasdiqlay olmayman, ammo shuni aytishim mumkinki, biz tarjimon bo‘lib yoki boshqa sohalarda ishlagan viza talab qiluvchilar guruhini aniqladik, ular Afg‘oniston tashqarisidagi joylarga ko‘chiriladi”, — deb javob qildi Psaki. “Turli xil variantlar mavjud. Bu avgust oxirida qo‘shinlarni olib chiqib ketish tugaguniga qadar amalga oshiriladi.”
Pentagon vakili Jon Kirbining ma’lum qilishicha, Afg‘onistondagi Bagram aviabazasini tark etganidan keyin ham AQSh aksilterror operatsiyalari uchun mintaqadagi imkoniyatlarini saqlab qoladi. Uning so‘zlarga ko‘ra, Afg‘onistondagi AQSh kontingentining qo‘mondonlik tarkibidagi o‘zgarishlar va harbiylarning Bagram bazasidan chiqib ketishi amerikaliklarga bu mamlakatda oz sonli harbiylarni saqlab turishga imkon beradi.
“Ushbu harbiylar kelgusi davrda to‘rtta masalaga yo‘naltiriladi: mamlakatda diplomatik mavjudlikni himoya qilish, aeroportda xavfsizlikni ta’minlash, afg‘on harbiylari va xavfsizlik kuchlarini qo‘llab-quvvatlash va ularga yordam berish hamda terrorizmga qarshi harakatlarni qo‘llab-quvvatlash”, — dedi Kirbi.
Pentagon vakilining so‘zlariga ko‘ra, Amerika kuchlari Bagram bazasidan chiqarilgandan so‘ng ham “missiya davom etadi, ammo Afg‘oniston bilan munosabatlar butunlay boshqa yo‘nalish oladi”. “Hatto Afg‘onistondan tashqarida bo‘lsak ham, mintaqada kuchli mavqeimiz bor. Terrorizmga qarshi kurashish uchun zarur paytda shay holga kelish qobiliyatimiz hali ham mavjud”, — dedi u.
Kirbining ma’lum qilishicha, AQShning Afg‘onistondagi harbiy kontingenti AQSh Qurolli kuchlari Markaziy qo‘mondonligi rahbari general Kennet Makkenzi nazoratiga o‘tadi, generalga tegishli vakolatlarni topshirish jarayoni bir necha hafta davom etadi.
“Biz avgust oxiriga qadar Afg‘onistonni tark etish uchun prezident ko‘rsatmasiga binoan qo‘shinlarni xavfsiz va tartibli olib chiqishni davom ettirmoqdamiz. AQSh Mudofaa vaziri Lloyd Ostin Afg‘onistondagi missiyamiz qo‘mondonligini general-leytenant Ostin Skott Millerdan general Kennet Makkenziga o‘tkazish rejasini tasdiqladi. Biz qo‘mondonlik ushbu oyning oxirida topshirilishini kutmoqdamiz. General Miller vakolat va javobgarlikni general Makkenziga topshirish ishlarini tayyorlash va yakunlash uchun yaqin haftalardan Afg‘onistonda bo‘ladi”, — dedi Kibri.
Uning so‘zlariga ko‘ra, Makkenzi Afg‘onistondagi kuchlar qo‘mondonligining barcha vakolatlarini o‘z zimmasiga oladi.