“Tolibon” bilan to‘qnashuvdan so‘ng 1000 dan ortiq afg‘onistonlik harbiylar Tojikistonga chekindi

“Tolibon” bilan to‘qnashuvlardan keyin chekingan 1000 dan ortiq afg‘onistonlik harbiylarni Tojikiston chegarachilari o‘z mamlakatiga kiritdi. Bu haqda Tojikiston chegara xizmatiga asoslanib, “Xovar” agentligi xabar berdi.

“Tolibon’ bilan qurolli to‘qnashuv paytida 1037 nafar afg‘on harbiy xizmatchilari o‘z hayotini saqlab qolish uchun chegara orqali ortga chekindi”, — deyilgan xabarda.

Afg‘onistonliklar Tojikiston bilan chegara chizig‘i bo‘ylab turli nuqtalarda chegarani kesib o‘tgan. Aksariyat harbiylar Xorug‘ shahri yaqinidagi chegara postini (312 kishi), shuningdek, Darvoz viloyatidagi chiziqni (213 kishi) kesib o‘tgan.

Chegara xizmati Afg‘oniston harbiylari Tojikiston hududiga yaxshi qo‘shnichilik munosabatlari hamda mamlakat ichki ishlariga aralashmaslik nuqtayi nazaridan kiritilganini qo‘shimcha qildi.

AQSh boshchiligidagi NATO davlatlari o‘z qo‘shinlarini Afg‘onistondan olib chiqishni boshlagach, mamlakatda “Tolibon” harakati hukumat kuchlariga qarshi ommaviy hujum boshladi. So‘nggi 20 yildagi boshqa davrlarga qaraganda “Tolibon” hozir mamlakatning ko‘proq hududlarini — taxminan, 40 foizini nazoratga olgan. “Tolibon”ning xatti-harakatlariga javoban Afg‘oniston milliy safarbarlik e’lon qilib, ko‘ngillilarga qurol tarqatishni boshladi.

23-iyun kuni 130 dan ortiq afg‘on harbiylari “Tolibon” bilan janglardan keyin Tojikiston chegarasini bosib o‘tdi. O‘shanda chekinganlar orasida to‘rt nafar yarador bo‘lgan, ulardan biri keyinroq vafot etgan.

Shuningdek, 3-iyul kuni “Tolibon” bilan to‘qnashuvdan keyin 300 dan ortiq afg‘onistonlik harbiylar Tojikistonga chekingan.

Avvalroq “Tolibon” Afg‘onistonning Tojikiston bilan chegaradagi hududini egallab olgani hamda tojik—afg‘on chegarasidagi vaziyat keskin deb baholanayotgani haqida xabar berilgandi. Keyinroq Afg‘onistonda hukumat qo‘shinlari “Tolibon” jangarilarini mamlakat shimolidagi bir nechta tumanlardan siqib chiqargani ma’lum bo‘ldi. AQSh davlat kotibi Entoni Blinken Afg‘onistondan AQSh qo‘shinlari chiqarib ketilgach, mamlakatda hokimiyat tepasiga “Tolibon” jangarilari kelishi mumkinligini istisno qilmagandi.

Afg‘onistondan NATO qo‘shinlarini olib chiqish 29-aprelda boshlangan, AQSh va “Tolibon” o‘rtasida tuzilgan kelishuvga binoan jarayon kuzda yakunlanishi kerak. Bugunga qadar Germaniya va Italiya Afg‘onistondan o‘z qo‘shinlarini olib chiqishni yakunladi.