Афғонистон ҳукумати Россия билан қурол-яроғ етказиб бериш бўйича музокаралар олиб бораётгани йўқ, деб ёзади «Коммерсантъ» Афғонистон президентининг миллий хавфсизлик бўйича маслаҳатчиси Ҳамидулла Моҳибга таяниб. Расмийнинг таъкидлашича, Москва билан ҳамкорликни бошқа йўл билан, хусусан, ахборот алмашиш орқали амалга ошириш мумкин.

«Йўқ, биз бу борада ҳарбий қўллаб-қувватлаш ҳақида гапирмаяпмиз. Бизнинг маслаҳатлашувларимиз позицияларимизни бир-бирига яқинлаштириш ва ҳам Афғонистонга, ҳам бутун минтақага бўлаётган таҳдидлар тўғрисида умумий тушунчани шакллантиришга қаратилган», — деди Моҳиб «РИА Новости»га берган интервьюсида. Унинг сўзларига кўра, умумий тушунча «ахборот алмашинуви, техник имкониятлардан бирга фойдаланишдан иборат бўлиши мумкин».

Маслаҳатчининг сўзларига кўра, АҚШ қўшинларининг Афғонистондан олиб чиқилиши, мамлакатга «техник ва сиёсий даражадаги ўзаро ишонч ва ҳамкорлик орқали ҳар қандай таҳдидларга қарши биргаликда курашиш учун минтақа билан кучларни бирлаштириш имкониятларини очади».

АҚШнинг ҳаракатлари, шунингдек, барча кучларнинг янги ҳукуматда иштирок этишини таъминлашга ёрдам беради, дея таъкидлади Моҳиб.

Афғонистондан АҚШ ва НАТО қўшинларини олиб чиқиш 29 апрелда бошланган. АҚШ қўшинларини олиб чиқиш амалиёти август охирига қадар тугашини маълум қилди. Айни пайтда АҚШ давлат котиби Энтони Блинкен Афғонистондан АҚШ қўшинлари чиқариб кетилгач, мамлакатда ҳокимият тепасига «Толибон» жангарилари келиши мумкинлигини истисно қилмаганди.

Аввалроқ АҚШ расмийлари Ўзбекистон, Қозоғистон ва Тожикистонга АҚШ ҳарбийларига ёрдам берган афғонларни вақтинча қабул қилишни сўраб мурожаат қилгани ҳақида хабар берилганди. Таъкидланишича, мазкур фуқаролар АҚШ ҳарбийлари чиқиб кетгач «Толибон»нинг репрессияларидан қўрқмоқда. Шу билан бирга Афғонистон ҳукумати АҚШ қўшинлари олиб кетилганидан олти ой ўтгач қулаши мумкинлиги хабар қилинди.

Бугунга қадар Германия ва Италия Афғонистондан ўз қўшинларини олиб чиқишни якунлади.