Бирлашган Араб Амирликлари (БАА) аҳолини COVID-19’га қарши эмлаш даражасининг юқорилиги бўйича дунёда биринчи ўринни эгаллади. Бу ҳақда Vaccine Tracker маълумотларига таяниб Bloomberg хабар берди.
Агентлик ҳисоб-китобларига кўра, БААда ҳаммаси бўлиб 15,5 миллион доза вакцина ишлатилган. Мамлакатда истиқомат қилувчи 10 миллион аҳолининг 72,3 фоизи бир ёки икки дозада вакцина олган. Шуларнинг 63,7 фоизи коронавирусга қарши тўлиқ эмланган.
Аҳолини эмлаш даражаси бўйича иккинчи ўринда Сейшел ороллари турибди. У ерда аҳолининг 71,7 фоизи — 100 мингга яқин одам COVID-19’га қарши эмланган. Кучли учликнинг сўнгидан Баҳрайн жой олди. Мамлакатда 2,07 миллион доза вакцина ишлатилиб, аҳолининг 69,7 фоизи эмланган.
Bloomberg хабарига кўра, вакцинацияда етакчи бўлишига қарамай, БААда COVID-19 билан касалланиш ҳолатлари юқори бўлиб қолмоқда. Март ойидан буён мамлакатда суткасига 2 мингга яқин кишида коронавирус тасдиқланмоқда. Ўтган ҳафта АҚШ коронавируснинг «жуда юқори даражаси» туфайли фуқароларни БААга бормасликка чақирди. Саудия Арабистони ҳам ушбу мамлакатга саёҳат қилишни вақтинча тақиқлаган, Буюк Британия эса январь ойида БААни «қизил рўйхат»га киритган эди.
Шу билан бирга БАА жон бошига коронавирус тестларини аксарият мамлакатлардан кўпроқ ўтказади, мамлакатда COVID-19’дан ўлимлар сони дунёдаги энг паст кўрсаткични ташкил қилади.
БАА расмийлари 4 июль куни Moderna компаниясининг коронавирусга қарши вакцинасидан фавқулодда фойдаланишга рухсат берди. Moderna БААда тасдиқланган бешинчи вакцина бўлди.
Айни пайтда мамлакатдаги эмлаш дастури маҳаллий ишлаб чиқариладиган Sinopharm вакцинасига асосланган. Мамлакат ҳукумати илгари икки доза вакцина олган фуқароларга Sinopharm вакцинасининг учинчи дозасини таклиф қилишни режалаштирмоқда.
Изоҳ (0)