Ўзбекистон ва дунёнинг турли бурчакларида 5 май куни олинган қизиқарли суратларни тақдим этамиз.

Тошкентга АҚШдаги Boeing заводидан тўғридан-тўғри рейс билан келган Uzbekistan Airways’нинг олтинчи Dreamliner’и учувчилар жамоаси командири Руслан Алмамедовни фарзандлари гул билан кутиб олмоқда. Командир ўғли билан саломлашаётган лаҳза.

Фото: «Дарё» / Мадина Нурман

Мавзуга доир: Ўзбекистонга олтинчи Dreamliner самолёти келтирилди (фото)

Веллингтон коллекцияси ходими Жозефин Оксли Наполеон Бонапартнинг ўлим ниқобини император вафотининг 200 йиллигига бағишланган кўргазмада намойиш этиш учун тайёрламоқда. Бу ниқоб император вафот этгандан сўнг унинг юзига мум ва гипс аралашмаси қопланган ҳолда олинган. Наполеон 1821 йилнинг 5 май куни Муқаддас Елена оролида вафот этган.

Фото: PA

Индонезиядаги Пасар Сенен темир йўл станциясида тиббиёт ходимлари Рамазон ҳайити байрамидан олдин поезд йўловчиларидан коронавирус таҳлили учун намуна олмоқда. Касаллик тарқалишининг олдини олиш учун ҳукумат бу йил ҳайитда меҳмонга ташриф буюришни тақиқламоқчи.

Фото: EPA

Мудофаа вазирлиги томонидан Тошкент бўйлаб ретро автомобиллар марши, гавжум нуқталарда ва метро бекатларида ҳарбий ансамбль ва оркестр ижросида мусиқий дастурлар намойиш этилди.

Фото: Мудофаа вазирлиги матбуот хизмати

Мавзуга доир: Тошкентда 4—7 май кунлари ретро автомобиллар марши бўлиб ўтади

Гватемаладаги Пакая вулқонидан лава оқиб чиқаётган бир вақтда осмонда чақмоқ чақмоқда.

Фото: Getty Images

Мавзуга доир: Филиппинда 200 дан ортиқ зилзиладан кейин вулқон отилди

Буюк Британия собиқ бош вазири Гордон Браун Шотландиядаги маҳаллий сайловлар олдидан бўлиб ўтган митингда Лейбористлар ҳаракати лидери Анас Сарвар билан бирга чиқиш қилди.

Фото: The Guardian

Стюардессалар Тошкентга АҚШдаги Boeing заводидан тўғридан-тўғри рейс билан келган Uzbekistan Airways’нинг олтинчи Dreamliner’и экипажини кутиб олиш учун гул билан бормоқда. Ушбу самолёт орқали Оролбўйи ҳудудлари учун 3 миллион долларлик гуманитар ёрдам ҳам етказиб берилди.

Фото: «Дарё» / Мадина Нурман

Кўк терак қишлоғидаги вайрон бўлган уй олдида ўтирган қирғизистонлик эркак. Яқинда тожик—қирғиз чегарасидаги баҳсли ҳудудда содир бўлган тўқнашув вақтида эвакуация қилинган одамлар ўз қишлоқларига қайтарилди.

Фото: AFP

Мавзуга доир: Қирғизистон прокуратураси Тожикистон билан низони «бостириб кириш» деб атади, Тожикистон прокуратураси эса Қирғизистоннинг ҳаракатларини «тажовузкорлик» деб баҳолади

Россиялик теннисчи Даниел Медведев Мадриддаги «Мастерс» мусобақасининг иккинчи даврасида Алехандро Давидович-Фокинни мағлуб этди.

Фото: AP Photo

Иккинчи жаҳон уруши даврида Ленинград қамалидан сўнг бедарак йўқолган аскар — Бобораҳим Абдуллаевнинг хоки Ўзбекистонга олиб келинди. 1922 йилда туғилган Бобораҳим Абдуллаев 1941 йилда урушга кетиб, қайтиб келмаган. Унинг хоки ўзи туғилган Энам яхши қишлоғига дафн қилинди.

Фото: Мудофаа вазирлиги матбуот хизмати

Германиянинг Росток шаҳри ҳайвонот боғидаги қундуз янги бошпанага ўтказилди.

Фото: Getty Images

Тошкент шаҳридаги Мустақиллик кўчасида светофор ишламаётгани сабаб кўчанинг нариги бетига ўтиш учун автомобиллар оқими камайишини кутаётган одамлар. Мирзо Улуғбек туманининг айрим ҳудудларида кундуз куни электр бўлмади, жумладан, «Дарё» интернет-нашри жойлашган бизнес марказида ҳам.

Фото: «Дарё» / Дилшод Шарипов

Мумбай яқинидаги кўрфазда йиғилган фламинголар галаси.

Фото: Getty Images

Ўзбекистон Қуролли Кучлари тизимида илк бор куч тузилмалари ўртасида Dog biatlon мусобақаси ташкил этилди. Унда Мудофаа вазирлиги, Миллий гвардия, Давлат хавфсизлиги хизмати, Давлат хавфсизлиги хизмати Чегара қўшинлари, Фавқулодда вазиятлар вазирлиги, Ички ишлар вазирлиги Қоровул қўшинлари қўмондонлиги ва Божхона қўмитаси жамоалари иштирок этмоқда.

Фото: Мудофаа вазирлиги матбуот хизмати

Боготадаги қашшоқлик ва полиция зўравонликларига қарши ўтказилаётган норозилик намойишида қатнашаётган аёл.

Фото: Reuters

Мавзуга доир: Колумбияда солиқ ислоҳотига қарши норозилик намойишларида 19 киши ҳалок бўлди, қарийб 850 киши жабрланди (видео)

Парижда император Наполеон Бонапарт ўлимининг икки юз йиллигига бағишланган марш ўтказилмоқда.

Фото: Getty Images

Мавзуга доир: Уч император жанги. Наполеон Бонапартнинг Аустерлиц жангидаги ғалабаси жаҳон сиёсатига қандай таъсир қилди?

Қримнинг Белогорск шаҳридаги Тайган Сафари боғида ўзларига тупроқ сочаётган филлар.

Фото: Reuters

АҚШнинг Алабама штатида кучли ёмғир ёғиши оқибатида бир нечта турар жой биноларини сув босди.

Фото: AP Photo

Бангкокдаги Клонг Той мавзесида мушуклари ёнида ухлаётган аёл. Мушуклардан бири занжирланган.

Фото: Reuters

Россияда 9 май куни Иккинчи жаҳон урушида фашистлар Германияси устидан қозонилган ғалабани ёдга олиш учун ўтказиладиган Ғалаба парадининг машқлари пайтида зирҳли субсоник ҳарбий Су-25БМ самолётлари Кремль устидан учиб ўтмоқда.

Фото: EPA

Мавзуга доир: Россияда Иккинчи жаҳон уруши фахрийларига бериладиган мукофот пули Ўзбекистон ва Қозоғистондагига нисбатан бир неча баравар кам бўлиб чиқди

Исроил хавфсизлик кучлари Қуддуснинг Шайх Жарроҳ туманида давом этаётган тўқнашувлар пайтида фаластинлик эркакни ҳибсга олди. Фаластинлик оилалар ушбу ҳудуддан исроиллик ҳарбийлар томонидан мажбуран чиқариб юборилмоқда.

Фото: Getty Images

Мексика пойтахтидаги поезд ўтиб кетаётган метро кўпригининг бир қисми қулаб тушган жойда турган полициячиларга сув бераётган аёл. Кўприк қулаши оқибатида камида 23 нафар киши ҳалок бўлгани айтилмоқда.

Фото: Reuters

Мавзуга доир: Мексикада метро ҳалокати қурбонлари хотирасига уч кунлик мотам эълон қилинди

Тиббий ҳимоя кийимини кийган Непал армияси ҳарбийлари коронавирусдан вафот этган кишининг жасадини крематорийга етказиш учун кутяпти.

Фото: Reuters

Рио-Гранде дарёси орқали Мексикадан АҚШнинг Техас штатига ўтаётган муҳожир оиласига ёрдам бераётган ҳарбийлар. Сўнгги ойларда миграция тўлқини Қўшма Штатларнинг жанубий чегараларида кенг ҳудудларни қамраб олди.

Фото: Shutterstock

Владивостокдаги «Русский» оролида полиэтилен пакетни тишлаб олган тулкилар.

Фото: «ТАСС»

Аддис-Абеба шаҳрида уруш қатнашчилари Эфиопиянинг Италиядан озод бўлишига бағишланган Ватанпарварлар ғалабаси кунининг 80 йиллигини нишонламоқда.

Фото: Getty Images

Аввалги кунларнинг фотогалереялари: