Kolumbiyada soliq islohotiga qarshi norozilik namoyishlarida 19 kishi halok bo‘ldi, qariyb 850 kishi jabrlandi (video)

Kolumbiyada soliq islohotlariga qarshi norozilik namoyishlarida 19 kishi halok bo‘ldi, 846 kishi jarohat oldi. Bu haqda El Pais nashri mamlakat milliy mudofaa vaziri Diyego Molanoning bayonotiga asoslanib xabar berdi. Shuningdek, mamlakat bo‘ylab 431 kishi hibsga olingan.

Namoyishlar olti kundan buyon Kolumbiyaning eng yirik shaharlari — Bogota, Medelin, Kali va Pereyrada bo‘lib o‘tmoqda.

Cali, Colombia today on the 3rd day of Peace protest. pic.twitter.com/GQVpONN9Ua

— Go Global Advisors Inc. (@GoGlobalAdvisor) May 2, 2021

Mudofaa vaziri namoyishchilarga qarshi kuch ishlatilishini asosli deb atadi. “Bular qasddan harakatlanayotgan buzg‘unchilar. Ular FARC va ELN’ning muxolifat guruhlari tomonidan tashkil qilingan va ular tomonidan moliyalashtirilib, mamlakatdagi vaziyatni beqarorlashtirishga intilmoqda”, — dedi mudofaa vaziri. Gap Kolumbiya Inqilobiy qurolli kuchlari va Milliy ozodlik armiyasining markaziy hokimiyat organlariga qarshi qurolli kurash olib borayotgan radikal chap qanot tashkilotlari haqida ketmoqda.

Vazirning so‘zlariga ko‘ra, namoyishchilar o‘z harakatlarini WhatsApp va Telegram messenjerlari orqali tashkil qilmoqda.

Molano miting ishtirokchilarini “terrorchilar” deb atadi. Uning aytishicha, namoyishchilarning xatti-harakatlari natijasida bir nafar politsiya kapitani o‘ldirilgan, 540 nafar huquq-tartibot idoralari xodimi va 306 nafar fuqaro jarohat olgan. Shuningdek namoyishchilar 94 bankka, 254 do‘konga, 14 pullik yo‘llarga, to‘rtta haykalga, 69 transport stansiyasiga, 36 bankomatga zarar yetkazgan.

BBC Kolumbiyadagi ombudsman idorasiga asoslanib xabar berishicha, namoyishlar paytida 16 nafar tinch aholi va bir politsiyachi halok bo‘lgan. Shu bilan birga, ta’lim xodimlari kasaba uyushmasi nashrga huquqni muhofaza qilish organlari xodimlari tomonidan 1089 ta zo‘ravonlik holatlari, shu jumladan, 726 ta o‘zboshimchalik bilan hibsga olish, 27 ta qotillik va oltita jinsiy zo‘ravonlik holatlari to‘g‘risida xabar berdi.

Prezident Ivan Duke bilan “samimiy uchrashuvdan so‘ng” norozilik namoyishlari o‘rtasida, Kolumbiya moliya va davlat kredit vaziri Alberto Karraskilla iste’foga chiqdi, deya xabar berdi vazirlik Twitter’da. Xabarga ko‘ra, Duke Karraskillaning o‘rniga ilgari savdo, sanoat va turizm vaziri bo‘lib ishlagan Xosye Manuel Restrepo tayinlanganini e’lon qildi.

Avvalroq Kolumbiya prezidenti Ivan Duke soliq islohotiga qarshi norozilik namoyishlari bo‘lib o‘tayotgan shaharlarga yordam uchun armiya yuborishini e’lon qilgan edi. Soliq islohoti loyihasi budjetni qo‘shimcha 6,8 milliard dollarga (taxminan yalpi ichki mahsulotning 2 foizi) to‘ldirishni ko‘zda tutadi. QQS (qo‘shilgan qiymat solig‘i) qo‘llashni kengaytirish, qo‘shimcha yig‘imlarni joriy qilish, aholining 2,4 million peso (660 dollar)dan yuqori bo‘lgan barcha daromadlarini soliqqa tortish taklif qilinmoqda. Bu ommaviy norozilik namoyishlariga olib keldi.