Яқин келажакда «Ўзбекистон темир йўллари» пойтахтнинг шаҳар ташқарисидаги манзиллар билан боғловчи янги электропоездларни (электричка) сотиб олишни ва унда йўловчилар оқимини кўпайтиришни режалаштирмоқда, дея хабар берди компания матбуот хизмати.
Қайд этилишича, Тошкентдан Бўстонлиқ туманида жойлашган Ҳожикентгача мавжуд йўналишдаги электропоездлар қатновига бўлган талаб йил сайин ортиб бормоқда. Бунинг сабаби Бўстонлиқ туманида шаҳар четидаги дам олиш манзиллари жойлашгани, сон-саноқсиз дам олиш масканлари ва санаторийларнинг мавжудлиги билан боғлиқ.
Бугунги кунда ушбу йўналишда кунлик йўловчилар ташиш ҳажми қарийб 2000 кишини ташкил қилади. Ҳар ҳафтанинг дам олиш кунлари ушбу йўналишдаги электропоездларнинг қатнаши жуда қулайлигини йўловчилар таъкидлаб келади.
Пойтахт аҳолиси ва меҳмонлари ҳордиқ чиқариш мақсадида мазкур ҳудудда вақт ўтказишни афзал кўради. Шу муносабат билан ушбу йўналишдаги автомобиль йўлида кўп километрлик тирбандликлар вужудга келиб, қимматли вақтни сарф қилишга тўғри келмоқда.
Бундай шароитда электропоезд (электричка) нарх жиҳатидан ҳам, кам вақт сарфланиши билан ҳам ҳақиқатан қулай транспорт воситаси ҳисобланади. Юқоридагиларни ҳисобга олган ҳолда, «Ўзбекистон темир йўллари» АЖ мазкур йўналиш учун яна 4 та янги тезюрар электропоездларни ишга туширишни режалаштирмоқда.
Бу Тошкентдан Ҳожикентгача ҳаракатланиш вақтини 2 соат 15 дақиқадан бир соатгача қисқартиришга, автомобиль йўлларидаги тирбандликни камайтиришга, кунлик йўловчилар ташиш ҳажмини 2000 дан 12000 гача оширишга ва шаҳарлараро темир йўл транспорт тизимининг ривожланишига олиб боради.
Қайд этилишича, ҳозирда Хитой, Жанубий Корея, Беларусь ва Россияда ишлаб чиқарилган ҳаракатланувчи таркибнинг техник хусусиятлари ва нархлари батафсил ўрганилмоқда.
Ушбу жараёндаги ривожланиш тезлигига мос келадиган ҳаракатни ташкил этиш учун ҳозирги вақтда Тошкент—Ҳожикент йўналишидаги темир йўл участкалари ҳам жадал суратлар билан модернизация қилинмоқда, капитал таъмирланмоқда. Бу йўсинда мавжуд ҳаракат таркиб (электричка)лар ҳам модернизация қилинмоқда. Ҳозирда Тошкент ва Бекобод ўртасида ҳаракатланаётган электропоездда юмшоқ ўриндиқлар ўрнатилган, юк сақлаш жойлари кенгайтирилган.
Маълумки, 2020 йилнинг ёзидан Фарғона водийсидаги электрлаштирилган ҳалқа темир йўли Наманган–Андижон–Марғилон–Қўқон йўналишида электропоездлар ҳаракатлана бошлади. Ушбу минтақа Ўзбекистонда аҳоли энг зич жойлашган ҳудуд ҳисобланади ва бу ерда кунлик йўловчи ташиш ҳажми 8200 кишини ташкил қилмоқда.
Янги ҳаракат таркиблар сотиб олиниши биланоқ Андижондан Хонободга ҳам электропоезд ҳаракатини йўлга қўйиш режалаштирилган.
Бундан аввал Тошкент метросига Россиядан яна 10 та поезд келтирилиши, Тошкент—Наманган—Андижон йўналишида поездлар қатнови йўлга қўйилгани ҳамда Тошкент вилоятида «электричка» темир йўл рельслари орасида ётган маст эркакни туртиб юборгани ҳақида хабар берилганди.