O‘zbekistonga oltinchi Dreamliner samolyoti keltirildi (foto)

Avvalroq AQShdan Qoraqalpog‘istonga gumanitar yordam sifatida 3 million dollarlik tibbiyot buyumlari va jihozlari, sun’iy nafas oldirish moslamalarini o‘z ichiga olgan 40 futlik o‘nta konteyner yuborilgani, mazkur gumanitar yuk Project C.U.R.E. va Boeing bilan hamkorlikda amalga oshirilgani haqida xabar berilgan. Gumanitar yordam Sietldan Toshkentga Uzbekistan Airways uchun Boeing zavodida ishlab chiqarilgan yettita so‘nggi yangi Dreamliner samolyotidan biri orqali yetkazib berilishi aytilgan edi. 

5-may kuni ana shu samolyotlardan biri Boeing-787 Dreamliner Islom Karimov nomidagi “Toshkent” xalqaro aeroportiga kelib qo‘ndi. Tadbirda Uzbekistan Airways rahbariyati, jamoatchilik hamda ommaviy axborot vositalari vakillari qatnashdi. Samolyot o‘t o‘chiruvchilarning mashinalaridan sepilgan suvli salyut bilan tantanali kutib olingach, o‘zbekistonlik ekipaj a’zolari birin-ketin bortdan tushib kela boshladi. Samolyot uchuvchilar jamoasining komandiri Ruslan Almamedov jurnalistlarga bergan intervyusida aytishicha, layner Boeing korporatsiyasining zavodi o‘rin olgan AQSHning Vashington shtatidagi Everett shahridan to‘g‘ridan-to‘g‘ri 12 soat 20 daqiqalik parvoz bilan yetib kelgan.

Bir hafta avval oltinchi samolyotni olib kelish uchun ketgan edik. Mutaxassislar bilan birga barcha tekshiruvlarni o‘tkazdik, amerikalik mutaxassislar bilan birga samolyotni uchirdik. O‘zbekistonning AQShdagi elchisi Javlon Vahobov ishtirokida samolyotni qabul qilib oldik. Samolyotimiz zo‘r, zamonaviy, 270 ta o‘rindig‘i bor, biznes-klass 24 ta o‘rindan iborat. Bortda Wi-Fi o‘rnatilgani uzoq masofalarga, 12-13 soatlik yo‘llarda uchganda qulay. Layner kompozit materiallardan tuzilgani, General Aviation dvigatellari qo‘yilgani sababli juda ham tejamkor. O‘rta Osiyoda birinchi bo‘lib Dreamliner havo kemalarini olganimizdan g‘ururlanaman.

Ruslan Almamedov, samolyot uchuvchilar jamoasining komandiri

Boeing 767 bilan taqqoslaganda ushbu Dreamlinerning yoqilg‘i samaradorligi 10 foizga, har bir yo‘lovchiga nisbatan hisoblaganda esa 20 foizga yetadi, shovqin darajasi 60 foizgacha kamaytirilgan. Tashqi korpusining 50 foizi kompozit, 20 foizi alyumin materialdan qilingan, GE Aviation tomonidan ishlab chiqarilgan GEnx-1B dvigatellari bilan ta’minlangan. Saloni nisbatan kengroq, dizayni Boeing SkyInterior uslubida yaratilgan. HEPA-filtrlardan iborat sifatli filtrlash tizimi har 2 daqiqada salon havosini tozalaydi.

Uzbekistan Airways 2016-yilda Dreamliner’larning tijoriy ekspluatatsiyasini boshlagan va Boeing 787ning Markaziy Osiyodagi birinchi buyurtmachisiga aylangan. Ilk ikki samolyot 2016-yilda, uchinchisi 2018- yilda va yana ikkitasi 2019-yilda olib kelingan. 

Ma’lumot uchun, hukumatning tegishli qarori bilan 2020-yil 16-mart kuni “To‘rtta yangi Boeing-787-8 samolyotini xarid qilish” investitsiya loyihasining texnik-iqtisodiy asoslari tasdiqlangandi. Hujjatga ko‘ra, Boeing-787-8 samolyotlari oxirgi 3 yilda Xitoy davlat taraqqiyot banki tomonidan ajratilgan kredit mablag‘lari hisobidan sotib olingan. Shuningdek, samolyotlar xaridi uchun Tiklanish va taraqqiyot jamg‘armasi kreditlari, boshqa moliyalar ham yo‘naltirilgan. Eslatib o‘tamiz, Prezident Shavkat Mirziyoyev 19-aprel kuni Uzbekistan Airways hamda Uzbekistan Airports aksiyadorlik jamiyatlarini transformatsiya qilish chora-tadbirlari taqdimoti bilan tanishgan edi.

Bundan avval Boeing 787 Dreamliner’larini ishlab chiqarishda yangi nuqson aniqlangani hamda ikkita aviahalokatdan so‘ng birinchi marta Boeing 737 MAX samolyoti yo‘lovchilar bilan parvoz qilgani haqida xabar berilgan.