Filippinda 1-aprel holatiga ko‘ra, o‘tgan bir kecha-kunduzda 212 ta zilzila ro‘yxatga olindi. Shundan keyin Taal vulqoni harakatga keldi. Bu haqda “Korrespondent.net” xabar berdi.

Foto: “France24.com”

Seysmologlar bir daqiqadan 20 daqiqagacha davom etgan 168 ta, past tebranishli 44 ta zilzilalarni ro‘yxatga olgan.

“Bu vulqon ostida yuzaga kelgan magmatik faollikni ko‘rsatadi”, — deb ta’kidladi Filippin vulqonshunoslik va seysmologiya instituti rahbari Renato Solidum.

Hozir Taal vulqoni oroliga kirish, shuningdek, vulqon hududida samolyotlar parvozi taqiqlandi.

Kuchli portlash sodir bo‘lgan taqdirda vulqon yaqinida yashovchi fuqarolarni evakuatsiya qilishni boshlash uchun mahalliy hukumat vaziyatni kuzatmoqda.

Taal janubi-sharqiy Osiyodagi eng faol vulqonlardan biri bo‘lib, u mashhur sayyohlik obyekti hisoblanadi.

Ma’lumot uchun, Islandiyada o‘tgan haftada 50 mingdan ortiq zilzila sodir bo‘ldi. Tebranishlar mamlakat poytaxti Reykyavikdan 30 kilometr uzoqlikda qayd etildi. Shundan keyin 900 yillik vulqon harakatga keldi. Osmon qizil tusga kirdi. Odamlarga ko‘chaga chiqmaslik va uyining oynalarini ochmaslik tavsiya qilinmoqda.

Shuningdek, Sumatra orolida Sinabung vulqoni harakatga kelgani, Sitsiliyada Etna vulqoni, Indoneziyada Levotolo vulqoni uyg‘ongani haqida xabar berilgandi.

Gvatemalada esa Pakaya vulqoni otilib chiqishda davom etmoqda, lava oqimi qahva plantatsiyalarigacha yetib bordi va turar joy binolarini vayron qildi.