Meksikaning Mexiko shahridagi metro halokati qurbonlari xotirasiga uch kunlik motam e’lon qilindi. Prezident Andres Manuel tegishli farmonni imzoladi, deb yozadi “Kommersant”.
Foto: Getty Images
“Mexiko metrosi jamoaviy transport tizimining 12-liniyasida 2021 yil 3-mayda sodir bo‘lgan fojia munosabati bilan uch kunlik milliy motam e’lon qilindi”, — deyiladi hujjatda. Farmon 7-may kunigacha amal qiladi. Ushbu muddatda davlat bayroqlari yarim tushurilgan holda bo‘ladi.
Eslatib o‘tamiz, mahalliy vaqt bilan 3-may kuni 22:30 da (Toshkent vaqti bilan 4-may 08:30) Meksika poytaxtida 12-metro liniyasi ko‘prigi poyezd o‘tib ketayotgan paytda qulab tushgan. Hodisaga metro ko‘prigi ustunlaridan biriga avtomobil kelib urilishi sabab bo‘lgan.
Shahar meri Klaudiya Sheynbaumning bayonotiga asoslanib, El Universal nashri hodisada halok bo‘lganlar soni 27 kishiga yetgani haqida xabar berdi. Undan avval shahar meri qurbonlar soni 23 kishiga yetgani, ular orasida voyaga yetmaganlar ham borligi tog‘risida bayonot bergan edi.
“Hodisa aybdorlari haqida gapirishga hali erta ... Tergov natijalari aniq bo‘lmaguncha, biz ma’lumotlarga tayanib, taxmin qila olmaymiz”, — dedi shahar hokimi. Sheynbaumning so‘zlariga ko‘ra, ayni paytda metropoliten yo‘lovchilari uchun muqobil harakat transporti tashkil qilingan. El Universal nashrining xabar berishicha, Favqulodda vaziyatlar vazirligining so‘nggi ma’lumotlariga ko‘ra, YTHda 80 kishi jarohat olgan.
Qayd etilishicha, 2017-yilgi zilziladan keyin ayni paytda qulab tushgan estakadaning ustunlarida yoriqlar paydo bo‘lgan, mahalliy aholi o‘sha vaqtdayoq uning qulab tushishidan xavfsiragan edi.
