ОАВ: Эрон АҚШнинг санкциялари бекор қилинмагунча уранни бойитиш даражасини туширмайди

Эрон АҚШнинг Теҳронга қарши санкциялари бекор қилинмагунча уранни бойитиш даражасини 20 фоиздан туширмаслигини маълум қилди. Бу ҳақда Эроннинг исми ошкор қилинмаган юқори лавозимли амалдорига таяниб «ТАСС» хабар берди.

«Ураннинг 20 фоизга бойитилиши ядровий битимнинг 36-бандига мос келади ва агар АҚШ барча санкцияларни бекор қилсагина бу фоиз пасайтирилади», — деди ҳукумат вакили. Расмийнинг қўшимча қилишича, «АҚШ президенти Жо Байден маъмурияти вақтни беҳуда кетказмоқда». «Агар улар санкцияларни тез орада бекор қилмаса, Эрон кейинги қадамларни ташлайди, бу эса Эроннинг ядровий битим бўйича мажбуриятларини янада камайтиришни англатади», — деди у.

Politico газетасининг хабар беришича, АҚШ маъмурияти шу ҳафта Эрон ҳукуматига Қўшма ҳаракат режаси атрофидаги вазиятни ҳал қилиш бўйича янги таклифларни тақдим этади. Нашрнинг таъкидлашича, ушбу ташаббус Теҳроннинг илғор газ центрифугаларидан фойдаланиш ва уранни 20 фоизга бойитиш каби ядро соҳасидаги баъзи фаолиятларни тўхтатиб қўйишига жавобан АҚШнинг Эронга қарши санкцияларини маълум даражада юмшатишни назарда тутади.

АҚШ Давлат департаменти вакили Нед Прайснинг айтишича, агар Теҳрон ядровий келишув бўйича ўз мажбуриятларига тўлиқ қайтадиган бўлса, Қўшма Штатлар ҳам шундай қилади ва сўнг битим параметрларини кучайтиришга интилади. Ўз навбатида, Эрон ҳукуматининг расмий вакили Али Рабия АҚШ билан мулоқотни бошлаш учун Теҳрон санкцияларнинг бекор қилинишига ишонч ҳосил қилиши кераклигини таъкидлади.

Маълумот учун, 2021 йилнинг бошида Эрон Фордодаги ядро объектида уранни 20 фоизгача бойитиш жараёнини бошлади. Мамлакат ҳукумати бундай урандан йилига камида 120 килограмм ишлаб чиқаришни режалаштирмоқда. Теҳронда қайд этишларича, Халқаро ядро энергетикаси агентлиги аллақачон мазкур режалар ҳақида хабардор қилинган.

Аввалроқ Эронда янги ҳарбий денгиз ракета базаси очилгани ҳақида хабар берилганди. Таъкидланишича, барча жиҳозлар эронлик олимлар томонидан ишлаб чиқилган.