Шимолий Корея етакчиси Ким Чен Иннинг синглиси, Меҳнат партияси Марказий қўмитаси ахборот бўлими директор ўринбосари Ким Ё Чжон Жанубий Корея президенти Мун Чже Инни «Америка тўтиси» деб атади. Бу ҳақда унинг Корея Марказий телеграф агентлигида эълон қилинган баёнотига таяниб, «Интерфакс» хабар берди.
Хабарга кўра, Ким Ё Чжон Жанубий Корея президентини КХДРнинг ракета синовларидан сўнг мулоқотни давом эттиришга чақиргани учун танқид қилган. Унга кўра, Мун Чже Ин баллистик ракеталарнинг учирилишини қоралаб, иккала Корея давлати ва АҚШ ўзаро «мулоқотни давом эттиришга уриниши лозимлиги, уни мураккаблаштирадиган ҳаракатлар номақбуллигини» таъкидлаган.
«Унинг уятсизлигидан таажжубланмасликнинг иложи йўқ. КХДРни ўзини ҳимоя қилиш ҳуқуқидан маҳрум қилиш, уни БМТнинг резолюцияларини бузиш ва халқаро ҳамжамиятга таҳдид қилишда айблаш каби Жанубий Кореянинг бундай мантиқсиз ва сурбетларча хатти-ҳаракатлари АҚШнинг бузғунчилик мантиғига мос келади», — дейилади Ким Ё Чжоннинг баёнотида.
Унинг сўзларига кўра, Мун Чже Иннинг айтган гаплари бир-бирига зид келади, чунки у 2020 йил июль ойида қилган нутқида Жанубий Кореянинг ракета синовларини «тинчлик ва мулоқот ўрнатишга уриниш» деб атаган эди.
«Мун Чже Ин Жанубий Кореянинг Мудофаа фанлари институти томонидан олиб борилаётган баллистик ракеталар синовини Корея ярим оролидаги тинчлик ва мулоқотга қаратилганини таъкидлаган. Энди бўлса, Шимолий Корея Мудофаа фанлари академияси томонидан амалга оширилган ракета синовлари номақбул экан, бу жанубдагиларга жиддий ташвиш туғдириб, мулоқот атмосферасини совитармиш», — деди сиёсатчи ва Жанубий Корея президентини «Америка томонидан ўргатилган тўти» деб атади.
Эслатиб ўтамиз, 25 март куни Шимолий Корея иккита тактик ракетанинг муваффақиятли синовлари ҳақида маълум қилган. Кореялик ҳарбийлар хабарига кўра, иккала ракета ҳам КХДР шарқий қирғоқларидан 60 километр масофада жойлашган нишонга муваффақиятли бориб тегган.
КХДР Япон денгизига қарата иккита баллистик ракетани учирди. Ракета синовлари ҳақида Япония Мудофаа вазирлиги ва Жанубий Корея ҳарбийлари маълум қилган. Бунгача эса АҚШ ҳарбийлари Пхенян тез орада баллистик ракеталар учиришни қайта бошлаши ҳақида огоҳлантирган эди.
Кейинчалик Шимолий Корея ракеталарни ўзини ҳимоя қилиш мақсадида учирганини айтди. Корея Меҳнат партияси марказий қўмитаси котиби Ли Бен Чхол Вашингтон ва Сеулнинг ҳаракатларини қоралади. «Жанубий Корея ва АҚШ тизимли равишда хавфли ҳарбий машғулотлар олиб бориш ва замонавий қурол турларини жорий қилиш билан Корея яриморолига мунтазам ҳарбий таҳдид солиб келмоқда», — деди у.
Изоҳ (0)