Россия президенти Владимир Путиннинг асосий хоббиси — китобхонлик. Бу ҳақда президент матбуот котиби Дмитрий Песков журналистларга берган интервьюсида айтиб ўтди, деб ёзади «РБК».
«Унинг асосий севимли машғулоти — бу мутолаа. У асосан тарихий адабиётлар, ёдномалар ва бошқаларни ўқийди», — деди матбуот котиби.
Песковнинг таъкидлашича, президентга ўзи учун тайёрланган пресс-дайжестлар тақдим қилинса ҳам, унинг ўзи газеталарга обуна бўлади ва уларни тез-тез кўриб чиқади.
Чет тилларда мутолаа қилиш ҳақида берилган саволга матбуот котиби Путин «немис телеканалларини томоша қилади, бошқа телеканалларни инглиз тилида кўради, шунингдек, ҳафтада бир неча марта инглиз тилини ўрганиш билан алоҳида шуғулланади», деб жавоб берди.
Аввалроқ Песков Путин ҳар куни спорт билан шуғулланишини айтган эди. Унга кўра, президент доимий равишда самбо, шунингдек, сузиш ва хоккей билан шуғулланади.
Шунингдек, Путин табиат қўйнида дам олишни яхши кўриши ҳам маълум. Масалан, 2017 йил ёзида Россия раҳбари Тувада таътил ўтказиб, балиқ овлаган. 2019 йил октябрь ойида Путин ва мудофаа вазири Сергей Шойгу Сибир ўрмонига ташриф буюрган ва қўзиқорин терган, 2021 йилнинг март ойида ҳам вазир ва президент биргаликда дам олиш кунларини ўрмонда ўтказди.
Эслатиб ўтамиз, 23 март куни Россия президенти Владимир Путин коронавирусга қарши эмланди. Путин омма олдида эмланишдан бош тортган. Песков президент «камералар нишони остида» вакцина олишни ёқтирмаслигини айтганди. Президент матбуот котиби Путин «вакциналар тарғиботи учун шундоқ ҳам кўп нарса қилаётгани»ни таъкидлаган. Путин қайси вакцина билан эмлангани номаълум. Кремль бу маълумотни ошкор қилишдан бош тортди.Кремль Владимир Путиннинг вакцина олиш тўғрисидаги қароридан кейин мамлакатда коронавирусга қарши эмлаш суръатининг ошишига умид қилмоқда.
Аввалроқ Россия Давлат думаси Путинга яна президентликка номзодини қўйиш имконини берувчи қонунни қабул қилгани ҳақида хабар берилганди.
Изоҳ (0)