Италия бош вазири Марио Драги коронавирусга қарши AstraZeneca вакцинасининг биринчи дозасини қабул қилди. Бу ҳақда ҳукумат раҳбари матбуот хизматига таяниб «Korrespondent.net» хабар берди.
«Вазирлар Кенгашининг раиси Марио Драги ва унинг рафиқаси Мария Серенелла Каппелло Римнинг Термини темир йўл станциясидаги вакцинация марказида Лацио метрополитени ҳудудида кўзда тутилган эмлаш тақвимига мувофиқ вакцина қабул қилди», — дейилади хабарда.
73 ёшли Драги 19 март куни AstraZeneca’дан фойдаланишни тўхтатиб туриш фонида ўзининг айнан ушбу препарат билан эмланишини маълум қилган эди.
Аввалроқ Франция бош вазири тўғридан-тўғри эфирда коронавирусга қарши AstraZeneca вакцинаси билан эмланган эди. Шунингдек, Грузия президенти, Таиланд бош вазири коронавирусга қарши AstraZeneca вакцинаси билан эмланган.
Япония бош вазири Ёсихидэ Суга Pfizer компаниясининг вакцинаси билан эмланди. У коронавирусга қарши жамоатчилик олдида эмланган биринчи япон амалдори бўлди. Вакцинация вазирнинг АҚШ президенти Жо Байден билан апрель ойига режалаштирилган учрашуви олдидан амалга оширилди.
Украина президенти Владимир Зеленский эса коронавирусга қарши Ҳиндистонда ишлаб чиқарилган вакцина билан эмланди. Зеленскийни эмлаш учун Ҳиндистондаги заводда AstraZeneca томонидан ишлаб чиқарилган Covishield вакцинасидан фойдаланилди. Президентнинг сўзларига кўра, у вакцинани «аскарлар билан олд қаторда турадиган бош қўмондон сингари биринчилардан бўлиб» қабул қилди.
12 февралда Туркия президенти Ражаб Тоййиб Эрдўғон унга коронавирусга қарши вакцинанинг иккинчи дозаси юборилганини маълум қилган, Эрдоғон вакцинанинг биринчи дозасини 14 январда қабул қилиб олганди.
Бундан аввал Шаҳзода Чарльз ва унинг рафиқаси, БМТ бош котиби, Билл Гейтс ҳамда Аргентина президенти коронавирус вакцинаси билан эмланган.
Изоҳ (0)