Туркманистон президенти Гурбангули Бердимуҳамедов раислигида 29 март куни бир кун олдин бўлиб ўтган парламентнинг янги палатаси — Халқ Маслаҳати учун сайловлар натижасига бағишланган Вазирлар Маҳкамасининг йиғилиши бўлиб ўтди. Бу ҳақда Туркманистон давлат ахборот агентлигига таяниб, «Хроника Туркменистана» хабар берди.
Туркманистонда Сайлов ва референдумларни ўтказиш бўйича марказий комиссия раиси Гулмурад Мирадов сайловлар ҳақиқий деб топилганини айтди ва давлат раҳбарини Миллий кенгашнинг Халқ Маслаҳати палатасига аъзо этиб сайлангани билан табриклади.
Халқ мажлисининг амалдаги раиси Гулшат Маммедова ҳам Бердимуҳамедовни парламентга сайлангани билан табриклади, унинг сўзларига кўра, сайловчиларнинг 100 фоизи президент номзодига овоз берган, шунингдек, ташқи ишлар вазири Рашид Мередов ва бошқа бош вазир ўринбосарлари ҳам давлат раҳбарини қутлади.
Қайд этиш жоизки, 2020 йил сентябрь ойида қабул қилинган янги таҳрирдаги Туркманистон конституциясининг 73-моддасига мувофиқ, президент Туркманистон Миллий Кенгашининг аъзоси ёки депутати бўлиши мумкин эмас.
Конституциянинг янги таҳрири Адлия вазирлигининг веб-сайтида ҳали чоп этилмаган, аммо 2020 йил 26 сентябрда ўзгартиришлар «Нейтрал Туркманистон» газетасида эълон қилинган.
Миллий Кенгаш — парламентнинг умумий номи, у икки палатадан - Халқ Маслаҳати ва Халқ Мажлисидан иборат.
Бундан кўриниб турибдики, ҳозирги давлат раҳбари на Мажлис депутати ва на Халқ Маслаҳати аъзоси бўлиши мумкин. Конституциянинг 78-моддаси барча собиқ президентларга янги палатада ўринга эга бўлишни кафолатлайди, аммо Бердимуҳамедов ҳали ўз лавозимини тарк этмаган.
Шунингдек, 87-модда Халқ Маслаҳати аъзолари ва Халқ Мажлиси депутатларига бир вақтнинг ўзида Вазирлар Маҳкамаси аъзоси лавозимини эгаллашни тақиқлайди, Бердимуҳамедов эса бунга зид равишда Вазирлар Маҳкамасининг раисидир.
Маълумот учун, Халқ Маслаҳати 56 аъзодан иборат. Улардан 48 нафари бешта вилоят ва Ашхобод шаҳри томонидан, яна 8 нафари президент томонидан тайинланади. 8 мартгача давом этган рўйхатга олишдаги 111 номзод орасида амалдаги президент бўлмаган. Бироқ давлат ахборот агентлиги ҳисоботида 112 номзод тилга олинган. Яъни, Бердимуҳамедов бошқа номзодлар рўйхати эълон қилинганидан кейин рўйхатдан ўтган ёки у ўз номзодини ўзи кўрсатган.
Эслатиб ўтамиз, Туркманистонда 28 март куни биринчи марта парламентнинг юқори палатаси — Халқ Маслаҳати учун сайловлар бўлиб ўтди.
Аввалроқ Сайлов ва референдумлар бўйича марказий комиссия 111 нафар номзодни рўйхатдан ўтказгани ҳақида хабар қилинган. Номзодларнинг 16 нафари Ашхобод шаҳар ва вилояти халқ маслаҳати (халқ кенгашлари) томонидан кўрсатилган.
Сайлов кампанияси 8—27 март кунлари бўлиб ўтди. «Хроника Туркменистана» мамлакатда сайловлар билан боғлиқ бирорта сиёсий фаоллик сезилмаганини маълум қилди.
Маълумот учун, мамлакат ҳаётига бағишланган «Буюк ютуқлар хроникаси»нинг 2019 йилда чоп этилган 13-томида Халқ Маслаҳати йиғилиши (ўша пайтда у маслаҳатчи орган эди)да икки палатали парламент яратишнинг таклиф қилиниши йилнинг асосий ҳодисаси дея қайд этилган. 2021 йилда Туркманистонда икки палатали тизим жорий қилинди.
Изоҳ (0)