Словакияда «Спутник V» вакцинасига оид можаро туфайли бош вазир алмаштирилди

Словакия президенти Зузана Чапутова собиқ молия вазири Эдуард Хегерга янги ҳукумат тузишни буюрди. Собиқ бош вазир Игор Матович Молия вазирлигини бошқарадиган бўлди, деб ёзмоқда «Интерфакс».

Вазирликлардаги мазкур ўрин алмашишга Матовичнинг «Спутник V» коронавирусга қарши вакцинасини Словакияга етказиб бериш бўйича Россия билан музокаралар олиб бориш тўғрисидаги қароридан келиб чиққан можаро сабаб бўлди. Препаратнинг Европа дори-дармон агентлиги (ЭМА) томонидан тасдиқланмагани туфайли ҳукмрон коалициядаги баъзи партиялар уни қўллаш учун ЭМАънинг рухсатини кутишни талаб қилган.

Матович давлат раҳбари, вазирлар ва коалициядаги сафдошларига вакцинага оид келишув тўғрисида хабар бермаган. Вакцинанинг биринчи партияси 1 март куни мамлакатга кириб келган.

Матович дастлаб мамлакатда вакцинага эҳтиёж борлигини айтиб, ўз қарорини ҳимоя қилди. Ҳукмрон коалициядаги икки партия унинг истеъфосини талаб қилди. Можаро фонида Соғлиқни сақлаш вазирлиги раҳбари Марек Крайчи ва бошқа бир қанча вазирлар истеъфога чиқди. 28 март куни бош вазир ҳукумат раҳбари лавозимидан кетишини ва молия вазири Хегер билан лавозим алмашишни таклиф қилди. Хабар қилинишича, президент Чапутова ушбу таклифни маъқуллаган.

ОАВ хабарларига кўра, Хегер аллақачон Чапутовага вазирлар рўйхатини тақдим этган. Буни президент матбуот котиби Мартин Стрижинес ҳам тасдиқлаган. «Улар бир қатор мавзуларни муҳокама қилди, вазир таъкидлаганидек, барчаси яқин кунларда аниқ бўлади», — деб қўшимча қилди матбуот котиби. ОАВ, шунингдек, сўнгги ҳафталарда ишдан кетган баъзи вазирларнинг ҳукуматга қайтиши таклиф қилингани ҳақида хабар берган.

Аввалроқ Словакия бош вазири Матович коронавирусга қарши «Спутник V» вакцинаси эвазига Россияга Украинанинг Закарпате вилоятини бермоқчилигини айтиб, ҳазил қилганди. Украина ташқи ишлар вазирлиги Матовичдан айтган сўзлари учун расмий равишда кечирим сўрашни талаб қилди. Матович «ноўрин гапи» учун барча украиналиклардан кечирим сўраган.