Санк-Петербургнинг Красноселский туманида ўзбекистонлик микроавтобус ҳайдовчисига қилинган ҳужумда гумон қилинган шахс ҳибсга олинди. Бу ҳақда «Fontanka.ru» хабар қилмоқда.
Маълум қилинишича, Санкт-Петербургнинг Красноселский туманида микроавтобус ҳайдовчисига пичоқ билан жароҳат етказган шахсни топиш учун бир кундан кўпроқ вақт керак бўлди. Гумонланувчи ҳодиса жойидан бир километр нарида ушланган.
Қайд этилишича, 30 март куни кечки соат олтилар арафасида тезкор ходимлар Новогорелово қишлоғидаги Современников кўчаси 3-уйда жойлашган квартирада тергов ўтказишди. Тергов якунлангач, полиция танага оғир шикаст етказишда гумон қилинган 35 ёшли ижарачини олиб кетди.
Тергов маълумотларига кўра, ушланган шахс 28 март, якшанба куни эрталаб йўловчи сифатида К-403 микроавтобусида жанжал чиқариб, ҳайдовчига пичоқ билан ҳужум қилган. 34 ёшли Ўзбекистон фуқароси қорин соҳаси ва йўғон ичакдаги жароҳатлар билан касалхонага ётқизилган.
Қурол ёки шу каби нарсалар ёрдамида танага оғир шикаст етказиш моддаси билан жиноий иш қўзғатилган. Гумонланувчи икки кунга ҳибсга олинган ва 30 мартга ўтар кечаси вақтинча сақлаш изоляторига жойлаштирилган.
Бундан аввал Истанбулда ўзбекистонлик дея гумон қилинган марҳум йигитнинг шахсига аниқлик киритилгани, Санкт-Петербург метросида маст ҳолда полициячиларга ҳужум қилган ўзбекистонлик 10 ойга қамалгани ҳамда Ўзбекистонда қидирувда бўлган шахс Россияда қўлга олингани ҳақида хабар берилганди.
Изоҳ (0)