Shavkat Mirziyoyev 24-oktyabr kuni “BRIKS plyus” formatidagi sammitda so‘zlagan nutqida Yaqin Sharqdagi tobora keskinlashib borayotgan mojaro haqida to‘xtaldi.
Prezident Yaqin Sharqdagi tobora keskinlashib borayotgan mojaro O‘zbekistonni ham tashvishga solayotganini, bu mintaqa qo‘shni mamlakatlar va yirik davlatlarning mojaroga tortilishi bilan global inqirozning yirik o‘chog‘iga aylanib borayotganini qayd etdi.
“Biz G‘azo va Livandagi misli ko‘rilmagan gumanitar fojiani qalbimizdagi og‘riq hissi bilan qabul qilyapmiz. Tinch aholi, ayniqsa, bolalarning begunoh qurbon bo‘lishini hech qanday siyosiy maqsadlar oqlay olmaydi”, dedi Shavkat Mirziyoyev.
Davlat rahbari bugungi kunda o‘t ochishni zudlik bilan to‘xtatish va jabrlanganlarga shoshilinch yordam ko‘rsatish kechiktirib bo‘lmaydigan vazifalar ekanini ta’kidladi.
“Isroil—Falastin muammosining yagona yechimi — “ikki xalq uchun ikki davlat” tamoyili asosida mojaroni tinch yo‘l bilan hal qilish bo‘lib qolmoqda, deb hisoblaymiz”, dedi prezident.
O‘zbekiston yetakchisi global va mintaqaviy xavfsizlik haqida gapirganda, Afg‘oniston muammosini chetlab o‘tish mumkin emasligini ta’kidlab o‘tdi.
“Bizning umumiy vazifamiz – ushbu mamlakatni yakkalash emas, balki Afg‘oniston xalqiga va uning amaldagi hokimiyatiga ijtimoiy-iqtisodiy rivojlanish, tinch qurilish va taraqqiyotning dolzarb muammolarini hal etishda yordam ko‘rsatishdir”, dedi Shavkat Mirziyoyev.
Shavkat Mirziyoyev BRIKS sammiti doirasida Qozonga tashrifining birinchi kuni
Shavkat Mirziyoyev BRIKS sammiti tadbirlarida ishtirok etish va qator ikki tomonlama uchrashuvlar o‘tkazish uchun Qozon shahriga 23-oktyabr kuni tashrif buyurdi. Uni aeroportda Tatariston raisi Rustam Minnixanov, Qozon shahri meri Ilsur Metshin va boshqa rasmiy shaxslar kutib oldi. Tashrifning birinchi kuni Shavkat Mirziyoyev BRIKS sammiti ishtirokchilarini qutlash marosimida qatnashdi. Xitoy raisi Si Szinpin va Misr prezidenti Abdulfattoh as-Sisi bilan suhbatlashdi, Hindiston bosh vaziri Narendra Modi va Turkiya prezidenti Rajab Toyyib Erdo‘g‘on bilan uchrashuv o‘tkazdi. BRIKSning Yangi taraqqiyot banki prezidenti Dilma Rusef va “Sberbank” prezidenti va boshqaruv raisi German Grefni qabul qildi.
Sammit doirasida Shavkat Mirziyoyev va Rustam Minnixanov uchrashib, O‘zbekiston hududlarining Tatariston bilan o‘zaro manfaatli va ko‘p qirrali hamkorligini yanada kuchaytirish masalalarini muhokama qildi. Rustam Minnixanov Shavkat Mirziyoyevni Tatariston davlat mukofoti — “Do‘stlik” ordeni bilan taqdirladi.
BRIKS birlashmasi 2006-yilda tashkil etilgan. Hozirda Braziliya, Rossiya, Hindiston, Xitoy, Janubiy Afrika Respublikasi, Birlashgan Arab Amirliklari, Eron, Misr va Efiopiya uning aʼzolari hisoblanadi.
Izoh (0)