Farg‘onaga zamonaviy avtobuslarning navbatdagi partiyasi olib kelindi, deb xabar bermoqda Transport vazirligi.
Qayd etilishicha, Farg‘ona shahar jamoat transporti tizimini rivojlantirish, yo‘lovchilarga ko‘rsatilayotgan xizmatlarni sifat jihatdan yangi bosqichga olib chiqish maqsadida avtobuslar parkini yangilash davom etmoqda.
Xususan, “Farg‘ona avtotransxizmat” MCHJ tomonidan 12 dona zamonaviy Asia star rusumli avtobuslar olib kelindi. Mazkur avtobuslar Farg‘ona shahar ichi yo‘nalishlariga brutto-shartnoma asosida biriktiriladi.
2025-yil yakuniga qadar Farg‘ona shahriga tashuvchilar tomonidan 62 dona avtobuslar olib kelish rejalashtirilgan.
Bundan avval Angrenga 15 ta Yutong avtobusi olib kelingandi. Zoir Mirzayev 2024-yil oktyabrida o‘tkazgan hokimlik soatida Toshkent viloyatida transport sohasidagi xizmatlarni yaxshilash uchun 1000 ta yangi avtobus xarid qilish bo‘yicha topshiriq bergandi.
Transport vazirligi matbuot xizmatining bildirishicha, hududlarda aholiga ko‘rsatilayotgan transport xizmatlari sifatini yaxshilash maqsadida zamonaviy avtobuslarni olib kelish ishlari davom etmoqda. Toshkent shahriga yana 1000 ta Yutong avtobusini olib kelish imkoniyatlari o‘rganilmoqda. Andijon viloyatiga Xitoydan 100 ta elektrobus xarid qilinishi rejalashtirilgan.
Izoh (0)