Samarqand viloyatida yo‘lovchi tashish faoliyati bilan shug‘ullanuvchi tadbirkorlik subyektlari tomonidan harakat tarkibini yangilagan holda yo‘lovchilarga qulay va xavfsiz xizmat ko‘rsatishni tashkil etish masalasiga alohida e’tibor qaratilmoqda, deb xabar beradi Transport vazirligi matbuot xizmati.
Xususan, “Dilshodtransservis” MCHJ tomonidan Xitoyning CRRC kompaniyasida ishlab chiqarilgan 10 ta yangi avtobus olib kelingan.
Zamonaviy talablar asosida jihozlangan ushbu avtobuslar Samarqand shahar jamoat transportining yangi yo‘nalishlar tarmog‘ida yo‘lovchilarga xizmat ko‘rsatadi. Korxona tomonidan yana 20 ta ushbu rusumdagi avtobuslar olib kelinishi rejalashtirilgan.
Prezident Shavkat Mirziyoyev o‘zining Oliy Majlis va O‘zbekiston xalqiga yo‘llagan murojaatnomasida jamoat transporti mutlaqo o‘zgarishi haqida aytgan edi. Shundan so‘ng aprel oyida Toshkentga Xitoydan 268 ta avtobus va elektrobuslar olib kelindi.
May oyida Buxoroga yangi 100 ta avtobus va mikroavtobus, iyul boshida Sirdaryo viloyatiga esa 160 ta yangi avtobus olib kelinishi ma’lum bo‘ldi. Avvalroq “Toshshahartransxizmat”ga yo‘lovchilarni tashishda ko‘riladigan zararlarni qoplash uchun 18 milliard so‘m ajratilgani, Toshkentdagi 32 ta avtobus yo‘nalishida “kunlik plan” bekor qilingani haqida xabar berilgan edi.
Izoh (0)