Фарғонага замонавий автобусларнинг навбатдаги партияси олиб келинди, деб хабар бермоқда Транспорт вазирлиги.
Қайд этилишича, Фарғона шаҳар жамоат транспорти тизимини ривожлантириш, йўловчиларга кўрсатилаётган хизматларни сифат жиҳатдан янги босқичга олиб чиқиш мақсадида автобуслар паркини янгилаш давом этмоқда.
Хусусан, “Фарғона автотрансхизмат” МЧЖ томонидан 12 дона замонавий Asia star русумли автобуслар олиб келинди. Мазкур автобуслар Фарғона шаҳар ичи йўналишларига брутто-шартнома асосида бириктирилади.
2025 йил якунига қадар Фарғона шаҳрига ташувчилар томонидан 62 дона автобуслар олиб келиш режалаштирилган.
Бундан аввал Ангренга 15 та Yutong автобуси олиб келинганди. Зоир Мирзаев 2024 йил октябрида ўтказган ҳокимлик соатида Тошкент вилоятида транспорт соҳасидаги хизматларни яхшилаш учун 1000 та янги автобус харид қилиш бўйича топшириқ берганди.
Транспорт вазирлиги матбуот хизматининг билдиришича, ҳудудларда аҳолига кўрсатилаётган транспорт хизматлари сифатини яхшилаш мақсадида замонавий автобусларни олиб келиш ишлари давом этмоқда. Тошкент шаҳрига яна 1000 та Yutong автобусини олиб келиш имкониятлари ўрганилмоқда. Андижон вилоятига Хитойдан 100 та электробус харид қилиниши режалаштирилган.
Изоҳ (0)