Xitoy sudi Xunan viloyati Xitoy Xalq siyosiy maslahat kengashi qo‘mitasi raisining sobiq o‘rinbosari Day Daojinni poraxo‘rlik uchun o‘lim jazosiga hukm qildi. Bu haqda Xitoy markaziy televideniyesi xabar berdi.
Ma`lum qilinishicha, 24-iyun kuni Guandun viloyati Chjuxay shahrining o‘rta bo‘g‘in xalq sudida Xunan viloyati XXSMK qo‘mitasi raisining sobiq o‘rinbosari Day Daojin ishi bo‘yicha hukm e’lon qilingan.
“Ayblanuvchi Day Daojin poraxo‘rlik uchun o‘lim jazosiga hukm qilindi. Jazoning ijrosi ikki yilga kechiktirildi. Siyosiy huquqlardan umrbod mahrum etildi va barcha shaxsiy mol-mulki musodara qilindi”, deyiladi telekanal xabarida.
Bundan tashqari, amaldorning noqonuniy yo‘l bilan qo‘lga kiritgan mol-mulki va undan olingan daromadlar davlat xazinasiga topshirilishi, yetishmovchilik bo‘lgan taqdirda esa qo‘shimcha undirilib olinishi belgilangan.
Ta’kidlanishicha, u turli lavozimlardagi xizmat mavqeidan g‘arazli maqsadlarda foydalanib, to‘g‘ridan-to‘g‘ri yoki qarindoshlari orqali jami 107 million yuandan (taxminan 14,9 million dollar) ortiq moliyaviy va moddiy boyliklarni noqonuniy ravishda qabul qilgan. Iste’foga chiqqandan so‘ng, Day Daojin o‘zining avvalgi aloqalaridan foydalanib, yana 3,66 million yuan (taxminan 510 ming dollar) miqdoridagi qimmatbaho buyumlarni noqonuniy ravishda qo‘lga kiritgan.
XXRda korrupsiyaga oid jinoyatlar bo‘yicha sud tomonidan o‘lim jazosi tayinlanib, uning ijrosi ikki yilga kechiktirilishi kamdan-kam uchraydigan holat emas. Ikki yillik muddat tugagandan so‘ng o‘lim jazosi jazoni yengillashtirish yoki muddatidan oldin ozod qilish imkoniyatisiz umrbod qamoq jazosiga almashtirilishi mumkin.
2024-yilning noyabr oyida Dunyoning eng yirik banklaridan biri — Bank of China sobiq boshqaruvi raisi va partiya qo‘mitasi kotibi Lyu Lyanje poraxo‘rlikda ayblanib, o‘lim jazosiga hukm qilingandi.
Izoh (0)