Xitoy moliya sektorida korrupsiyaga qarshi yangi keng ko‘lamli tekshiruvlar o‘tkazilmoqda, deb xabar berdi Financial Times. Fevral oyidan beri o‘ndan ortiq soha rahbarlari tergov markaziga chaqirilgan yoki jazolangan.
Eng shov-shuvli ish Bank of China sobiq raisi Liu Lyangega tegishli. Mart oyi oxirida Xitoy Kommunistik partiyasining tartib-intizomni tekshirish bo‘yicha markaziy komissiyasi (CCDI) Lyange “intizom va qonunchilikni jiddiy buzganlikda” gumonlanayotganini ma’lum qildi, ammo tafsilotlarni keltirmadi.
Xitoy sanoat va tijorat bankining top-menejeri Kong Lin ham tergov ostiga tushgan. Ilgari u China Renaissance investitsiya banki tashkilotida ishlagan. Bank rahbari va asosiy egasi Bao Fan esa fevral oyining o‘rtalaridan beri aloqaga chiqmayapti. FT ma’lumotlariga ko‘ra, u katta ehtimol bilan hibsda.
Aprel oyida CCDI China Everbright Group sobiq raisi Li Xiaopengni “qonunni jiddiy buzganlikda” gumon qildi. Bu oyda Xitoy Eksport-import bankining Shanxay filiali rahbari ham 14 million dollar pora olganlikda ayblandi. Yanvar oyida Xitoyning yetakchi sug‘urta kompaniyasi China Life Insurance rahbari Van Bin korrupsiyada ayblangan edi. Tekshiruvlar Shanxay oltin birjasini ham chetlab o‘tmadi.
Mart oyining oxirida CCDI 30 dan ortiq yirik davlat kompaniyalarini tekshiruvdan o‘tkazishi haqida e’lon qilgandi. Ular orasida China Investment Corp., Suveren boylik jamg‘armasi, Xitoy taraqqiyot banki, Xitoy qishloq xo‘jaligi banki va boshqalar bor. Bu voqealar Si Szinpin (tarixda ilk bor) uchinchi muddatga Xitoy rahbari etib saylanganidan keyin sodir bo‘lmoqda, deya qayd etdi CNN. FT ma’lumotlariga ko‘ra, Si oktabr oyida partiya tarkibiy islohotlarni chuqurlashtirishga va “hamma turdagi moliyaviy faoliyatni tartibga solish bilan shug‘ullanishiga” va’da bergan.
Bloomberg manbalarining aytishicha, Xitoy hukumati bank sohasi vakillarini tekshiruvlar “hali tugallanmagani” haqida ogohlantirgan.
Izoh (0)