Farg‘ona viloyati O‘zbekiston tumanida to‘rt kishi fastfuddan zaharlandi. Bu haqda Sanepidqo‘mita matbuot xizmati xabar berdi.
Qo‘mitaning Farg‘ona viloyati boshqarmasi O‘zbekiston tumani bo‘limiga 6-noyabr kuni tuman Tibbiyot birlashmasiga qarashli Yuqumli kasalliklar bo‘limiga to‘rt nafar bemorni oshqozon-ichak faoliyatining funksiyasini buzilishi tashxisi bilan yotqizilgani yuzasidan xabarnoma berilgan.
Ushbu xabarnomaga asosan Sanepidqo‘mita xodimlari tomonidan sanitariya-epidemiologik surishtiruv ishlari olib borilgan.
Surishtiruv davomida bemorlarning ikki nafari 5-noyabr kuni tushlik vaqtida O‘zbekiston tumani “Yaypanbozorbosh” MFY, Ibn Sino ko‘chasida faoliyat olib borayotgan fastfud mahsuloti tayyorlab sotish shoxobchasida hot-dog mahsulotini isteʼmol qilgani, yana ikki nafar bemor esa ushbu tumanning “Oqtepa” MFY, “Turkiston” ko‘chasida faoliyat olib borayotgan fastfud mahsuloti tayyorlab, sotish shoxobchasida hot-dog mahsulotini isteʼmol qilgani aniqlangan.
Bemorlar shifokorlar tomonidan tibbiy ko‘rikdan o‘tkazilib, “Oshqozon-ichak faoliyatining funksiyasini buzilishi” tashxisi bilan bo‘limga yotqizilgan. Ularning umumiy holati qoniqarli.
Ayni paytda holat Sanepidqo‘mita mutaxassislari tomonidan to‘liq nazoratga olingan. O‘rganish ishlari davom ettirilmoqda.
Bundan bir necha oy avval Toshkentda bitta kafeda ovqatlangan 23 kishi zaharlanib, shifoxonaga yotqizilgandi. Buxoroda esa bir to‘yxonada ovqatlangan kamida 53 kishi ovqatdan zaharlangandi.
Izoh (0)