Samarqand shahrining Farhod qo‘rg‘onidagi to‘yxonada 26-may kuni bo‘lib o‘tgan to‘ydan so‘ng ommaviy zaharlanish sodir bo‘ldi. Bu haqda “Daryo” muxbiri Farhod Norbo‘tayev xabar bermoqda.
Ma’lum bo‘lishicha, 2022-yilning 26-may kuni Farhod qo‘rg‘onidagi to‘yxonada bo‘lgan to‘yda viloyatning Jomboy tumani “Olmazor” mahallasida yashovchi fuqarolar ishtirok etgan. Ular to‘y taomlaridan iste’mol qilgach, sog‘lig‘i yomonlashib, tuman tibbiyot birlashmasining yuqumli kasalliklar bo‘limiga murojaat qilgan.Jomboy tumani hokimligi axborot xizmati rahbari Orifjon Odilovning “Daryo”ga ma’lum qilishicha, ovqatdan zaharlanish kuzatilgan restoran Jomboy tumanida emas.
“Tumanimiz hududida ovqatdan zaharlanish bilan bog‘liq holat yuz bergani haqida xabarlar tarqalmoqda. Jumladan, Milliy hamda MY5 telekanali jurnalistlari tomonidan to‘y marosimida ishtirok etgan 196 nafar shaxsda xastalik alomatlari kuzatilgani xabar qilindi. Haqiqatan ham ‘Olmazor’ mahallasida istiqomat qiluvchi ayrim yurtdoshlarimiz qorin og‘rig‘i hamda ko‘ngil aynishi bilan tibbiyot muassasalariga murojaat qilgan. Ammo xabarlarda qayd etilganidek, bemorlar soni 200 nafar emas. Shuningdek, holatga aloqadorligi gumon qilinayotgan bazmgoh Samarqand shahrida joylashganini qayd etish joiz”, — deydi Orifjon Odilov.
Tuman tibbiyot birlashmasidan ma’lum qilinishicha, 28—31-may kunlari yuqumli kasalliklar bo‘limiga 13 nafar bemor yotqizilgan. Shuningdek, umumiy holati yengil bo‘lgan besh nafar bemor “Zarafshon” oilaviy shifokorlik punktida davolanmoqda. Patronaj hamshiralar to‘yda ishtirok etgan har bir fuqaro xonadonida bo‘lib, ularning salomatligini nazoratga olgan.
Orifjon Odilovning ma’lum qilishicha, ovqatdan zaharlanish tashxisi qo‘yilganlar orasida og‘ir ahvoldagi bemorlar va bolalar yo‘q.
Izoh (0)