Bosh prokuratura Samarqanddagi bog‘chalarda bolalar ovqatdan zaharlangani yuzasidan bayonot berdi

Samarqand shahrida 10-oktabr, payshanba kuni ikkita maktabgacha ta’lim muassasasining tarbiyalanuvchilari ovqatdan zaharlanib, viloyat yuqumli kasalliklar shifoxonasiga yotqizilgan haqida xabar berilgan edi. Bosh prokuraturasi mazkur holat yuzasidan bayonot berdi.

Aniqlanishicha, tarbiyalanuvchilar qayd etilgan maktabgacha ta’lim muassasalarida osh, borsh, makaron, salat kabi aralash ovqatlarni iste’mol qilganligi natijasida sog‘liqlari yomonlashib, shifoxonaga murojaat qilgan.

Shahardagi 80, 98 va 106-maktabgacha ta’lim muassasalariga “E.M.” korxonasi tomonidan autsorsing asosida xizmat ko‘satib kelingan.

Mazkur zaharlanish holati yuzasidan viloyat DSENM tomonidan 80, 98 va 106-MTM faoliyati vaqtincha to‘xtatilgan.

Hozirda bemorlarning ahvoli qoniqarli bo‘lib, davolash muolajalari davom ettirilmoqda.

Mazkur holat yuzasidan Samarqand shahar prokuraturasi tomonidan Jinoyat Kodeksining 257-1-moddasi 1-qismi bilan jinoyat ishi qo‘zg‘atilib, jinoyat ishi shahar IIB huzuridagi tergov bo‘limiga yuborilgan.

Ma’lumot uchun, so‘nggi bir oy davomida O‘zbekistonda ovqatdan ommaviy zaharlanish holatlari bir necha bor yuz berdi. Xususan, 20-sentabr kuni Namanganda o‘tkazilgan to‘y marosimida 18 kishi, 27-sentabr kuni Bekoboddagi 15-maktabgacha ta’lim tashkilotida 15 nafar bola, 30-sentabr kuni Andijondagi xususiy maktabda 82 nafar bola, 8-oktabr kuni Andijondagi 35-maktabda 27 kishi, xususan, 24 nafar bola ovqatdan zaharlanganib, kasalxonaga yotqizilgan.

Samarqand viloyatining o‘zida esa oxirgi bir oy davomida kamida ikki marta shunday favqulodda vaziyat kuzatildi: 14-sentabr kuni bo‘lib o‘tgan to‘ydan so‘ng 10 dan ortiq odam shifoxonaga murojaat qilgan, 6-oktabr kuni esa Samarqand shahridagi xot-dog shoxobchalaridan birida ovqatlangan kamida 24 kishi ertasi kuni kasalxonaga yotqizilgan.