TikTok’ning Singapurdagi ofisida xodimlar ommaviy zaharlandi

TikTok tarmog‘ining Singapurdagi ofisida xodimlarning ommaviy zaharlanishi ro‘y berdi. Bu haqda Bloomberg nashri xabar berdi.

Manbada aytilishicha, TikTok platformasi uchun asos hisoblangan ByteDance Ltd. kompaniyasining Singapurdagi ofisida zaharlanish qayd etilgan. Tibbiyot xodimlarining tezkor o‘rganishi natijasida hodisa oziq-ovqatdan kelib chiqqani aniqlangan.

Singapurning Straits Times gazetasi xabariga ko‘ra, 30-iyul kuni ishchilar qorin og‘rig‘i va qusish alomatlari sodir bo‘layotgani haqida xabar bergan. Shundan so‘ng kompaniya ofisi joylashgan One Raffles Quay tijorat binosi hududiga o‘n yettita tez yordam mashinasi yuborilgan.

TikTok kompaniyasining jami zaharlangan ishchilari 60 kishini tashkil etgan. Ulardan 57 nafari zudlik bilan kasalxonaga yotqizilgan. Dastlabki o‘tkazilgan tekshiruvlar bemorlarning barchasi bitta joydan ovqatlanganini ko‘rsatgan.

ByteDance vakili kompaniya vaziyatni tekshirish uchun rasmiylar hamda shifokorlar bilan hamkorlik qilayotganini aytgan. Tez orada barcha surishtiruvlar tugashi, vaziyat izga solinishi xabar qilingan.

“Biz xodimlarimiz salomatligi va xavfsizligiga juda jiddiy qaraymiz. Shu boisdan ham barcha jabrlangan xodimlarni qo‘llab-quvvatlash uchun zudlik bilan choralar ko‘rdik. Yordam ko‘rsatish uchun favqulodda xizmatlar bilan ishlayapmiz”, deyilgan kompaniya bayonotida.