Samarqand viloyatida tovuq go‘shtidan kabob iste’mol qilgan 15 nafar shaxs zaharlandi, deya xabar bermoqda Postda.
Qayd etilishicha, 2020-yilning 5-oktabr kuni Respublika shoshilinch tez yordam ilmiy markazining Samarqand viloyati filialiga 15 nafar shaxs “metgemoglobin hosil qiluvchi birikmalardan zaharlanish” tashxisi bilan murojaat qilgan.
Ma’lum bo‘lishicha, shu kuni soat 05:30 larda Samarqand shahrida yashovchi, 1987-yilda tug‘ilgan O.T. xonadonida uy sharoitida tovuq go‘shtidan kabob taomini tayyorlagan. Shu taomdan o‘zi bilan birga yashovchi 10 nafar oila a’zolari: turmush o‘rtog‘i, farzandlari, onasi, kelinoyisi, jiyanlari va shu xonadonda qurilish ishlarini olib borayotgan 5 nafar ustalar iste’mol qilgan. Birozdan so‘ng o‘zlarini yomon his qilishgach, tez yordamga qo‘ng‘iroq qilishgan.
Ularga tibbiy yordam ko‘rsatilib, davolash ishlari olib borilgan. Hozirda tegishli soha xodimlari tomonidan holat yuzasidan surishtiruv ishlari olib borilmoqda.
Avvalroq Andijonda tug‘ilgan kun tortidan 8 kishi, Qashqadaryoda ovqatdan 65 nafar ishchi zaharlangani xabar qilingandi.
Izoh (0)