2021-yilning avgustida Toshkent viloyati Oqqo‘rg‘on tumanidagi bog‘chada 25 nafar bola zaharlangani to‘g‘risida xabar berilgandi. Bosh prokuratura matbuot xizmatining “Daryo” so‘roviga ko‘ra ma’lum qilishicha, holat bo‘yicha 6 nafar shaxsga ayblov e’lon qilingan.
Toshkent viloyati IIB huzuridagi Tergov boshqarmasi tomonidan Oqqo‘rg‘on tumanidagi 5-sonli MTT tarbiyalanuvchilari zaharlanishi bilan bog‘liq jinoyat ishi (sanitariyaga oid qonunchilikni yoki epidemiyaga qarshi kurash qoidalarini buzish) bo‘yicha tergov harakatalari olib borilmoqda.
Hozirda jinoyat ishi bo‘yicha 6 nafar shaxsga nisbatan Jinoyat kodeksining 116 (kasb yuzasidan o‘z vazifalarini lozim darajada bajarmaslik), 207 (mansabga sovuqqonlik bilan qarash), 257-1-moddalari ayblov e’lon qilinib, ularga nisbatan tegishli ehtiyot choralari qo‘llanilgan. Tergov harakatlari davom etmoqda.
Eslatib o‘tamiz, Toshkent viloyatining Oqqo‘rg‘on tumanidagi bog‘chada 12-avgust kuni 25 nafar bola zaharlanib, shifoxonaga yotqizilgandi. 13-avgust kuni tibbiyot muassasalariga yotqizilgan tarbiyalanuvchilar soni 30 nafarga yetgandi. Shu kuni Oqqo‘rg‘onda bog‘cha bolasi pnevmoniyadan vafot etgan, ijtimoiy tarmoqlarda uning o‘limiga zaharlanish sabab bo‘lgani haqida xabarlar tarqalgan edi. 23-avgust kuni Maktabgacha ta’lim vazirligi ushbu bolalarning 25 nafariga uyiga javob berilganini ma’lum qilgan.
Izoh (0)