Buxoroda kamida 53 kishi ovqatdan zaharlandi. Bu haqda viloyat sog‘liqni saqlash boshqarmasi axborot xizmati xabar berdi.
Maʼlum qilinishicha, 12-aprel kuni, soat 22:00 larda Buxoro tuman markaziy shifoxonasiga qorinda og‘riq, ko‘ngil aynish, qusish va umumiy holsizlikka shikoyat qilib bemorlar murojaat qilishni boshlagan. Barcha bemorlar Buxoro tumani markazi Gala Osiyo shahrida joylashgan “Oqshom” to‘yxonasida ovqat isteʼmol qilish natijasida ushbu shikoyatlar kelib chiqqanini bildirgan.
Barcha bemorlarga o‘tkir diareya, gastritik va gastroenteritik shakli, o‘rta og‘irlikda kechishi, ovqatdan zaharlanish tashxisi qo‘yilgan va tegishli infuzion terapiya boshlangan. Buxoro tuman markaziy shifoxonasiga kech soat 03:00 ga qadar jami 16 nafar bemor (4 nafar bolalar, 12 nafar katta yoshdagilar) murojaat qilgan.
Bundan tashqari, Vobkent tuman tibbiyot birlashmasiga qarashli markaziy shifoxonaga ham xuddi shunday shikoyatlar bilan jami 37 nafar bemor (9 nafar bola va 28 nafar kattalar) murojaat qilgan. Ularga ham mazkur tashxis qo‘yilib, mutaxassislar tomonidan konsultatsiya o‘tkazilib, infuzion terapiya boshlangan.
13-aprel ertalab soat 09:00 holatida Buxoro tumanida davolanayotgan 11 nafar bemor va Vobkent tumanida davolanayotgan 32 nafar bemorlarning ahvoli yaxshilanib, qoniqarli ahvolda uyiga javob berilgan.
“Kun davomida qolgan bemorlar ham ahvoli yaxshilangach, uyiga javob beriladi. Tibbiyot brigadalari tomonidan to‘yda qatnashgan mehmonlar ahvoli hududlar kesimida nazoratga olingan”, – deyiladi xabarda.
Izoh (0)