“Daryo” saytida haftaning eng muhim va muhokamali xabarlari sharhini keltiramiz.
Dunyoning eng shinam metropolitenlaridan biri bo‘lgan Toshkent metropoliteni yanada qulaylashtirildi. Metroda yurishdan maqsad vaqtni iqtisod qilishdir. Ammo navbatda turib jeton olish va turniketga solish bu tejalgan vaqtni ba’zan yo‘qqa chiqarayozadi. O‘tgan hafta Toshkent metropolitenining 21 ta stansiyasida kontaktsiz to‘lov, ya’ni Humo plastik kartasi orqali yo‘lkira to‘lash dasturi nihoyasiga yetkazildi. Hozir metropolitenning “Buyuk ipak yo‘li”, “Amir Temur xiyoboni”, “Mustaqillik maydoni”, “Paxtakor”, “Mirzo Ulug‘bek”, “Chilonzor”, “Beruniy”, “Minor”, “Abdulla Qodiriy” bekatlarida karta yordamida to‘lash tizimi yaratilgan.
Eslatib o‘tamiz, Toshkent metrosi 1977-yilda ochilgan bo‘lib, hozir bir kunda 200 ming nafargacha yo‘lovchini tashiydi.
* * *
Hafta qayg‘uli voqealari Samarqand va Andijonda fuqarolarning ovqatdan zaharlanishidir. 7-oktabr kuni Samarqand viloyati yuqumli kasalliklar shifoxonasiga 24 fuqaro keltirildi. Bemorlarni umumlashtirib turuvchi fakt ular bir kun oldin Samarqand shahri Siyob dehqon bozori hududida joylashgan “Baxtiyor” MChJga qarashli xotdog tayyorlash shoxobchasidan xotdog va shaurma mahsulotlarini iste’mol qilishganidir. Falokat bir kelsa qo‘sha keladi, deganlariday, 10-oktabr kuni ham Samarqanddagi ikkita bog‘chaning bolalari ovqatdan zaharlanib, shifoxonaga yotqizildi. Ma’lum bo‘lishicha, bu MTMlar oziq-ovqat ta’minotida autsorsing xizmatidan foydalanadi, ya’ni ovqatni o‘zi pishirmay chetdan olib keladi.
8-oktabr kuni Andijonda 27 kishi ovqatdan zaharlandi. Ularning asosiy qismi tug‘ilgan kunni nishonlash mobaynida tort yeb kasalga chalingan maktab o‘quvchilaridir.
* * *
Ravshan Komilov bu haftada internet qahramoniga aylandi. Uning ishtirokidagi videolar qayta-qayta ulashildi, minglab izohlar yozildi. U xonanda Ravshan Komilov emas, Qashqadaryoning Mirishkor tumani hokimi Ravshan Komilovdir.
Hokimbobo daladan o‘g‘rincha makkajo‘xori olib mashinasiga solayotgan boshqa bir boboni sensirab qattiq dashnom bergan. “Nevaralaringni ham o‘g‘irlikka o‘rgatyapsanmi? Vijdoning chirisin seni. Padaringga la’nat. Ochingdan o‘l undan ko‘ra. Ishla, mehnat qil, sotib ol!” deb ta’na qilgan. “Daryo” muxbiri voqeaning tagiga yetish uchun Mirishkorga bordi. Videoni tuman hokimining o‘zi olib tarqatgani ma’lum bo‘ldi. Hokimning aytishicha, bu makkajo‘xorining juda qimmat navi bo‘lib, urug‘ining kilosi 1 dollardan oshiq turadi. Ravshan Komilov tuman eksporti uchun qayg‘urib, “o‘g‘ri bobo”ni tergaganini aytdi hamda qo‘pol so‘zlari uchun xalqdan uzr so‘radi.
Mavzuga doir:
Oxirgi vaqtda ketma-ket mag‘lubiyatlari bilan muxlislar hafsalasini pir qilayotgan O‘zbekiston MTJ nihoyat barchaning yuziga quvonch ulashdi. Futbol bo‘yicha O‘zbekiston terma jamoasi JCh—2022 saralashining ikkinchi bosqichi 3-turidan o‘rin olgan Yamanga qarshi bahsda yirik hisobda zafar quchdi. Bosh murabbiy Vadim Abramov o‘yindan so‘ng “Juda qiyin vaziyatda edik, natija o‘yinga mos bo‘ldi”, dedi. Yaman terma jamoasi bosh murabbiysi esa o‘zbekistonliklarning g‘alabasiga tajribani sabab qilib ko‘rsatdi.
* * *
Ashxobodda 11-oktabr kuni MDH davlat rahbarlari kengashi majlisi bo‘lib o‘tdi. Unda Shavkat Mirziyoyev ishtirok etdi, Turkmaniston, Tojikiston, Moldova prezidentlari, Armaniston bosh vaziri bilan uchrashdi. 2020-yilda MDHga raislik O‘zbekistonga o‘tadi. Shavkat Mirziyoyev O‘zbekistonning MDHga raisligi davomida asosiy e’tibor nimalarga qaratilishini ma’lum qildi. Buning uchun maxsus konsepsiya ishlab chiqilgan.
* * *
AOKA direktori Komil Allamjonov Samarqandda YeXHTga a’zo mamlakatlar elchilari ishtirokidagi O‘zbekistonda so‘z va matbuot erkinligiga bag‘ishlangan xalqaro davra suhbatida so‘zlagan nutqi matbuotimizning holatiga doir qator e’tiroflarga boy bo‘ldi.
Komil Ismoilovich, jumladan, “O‘zbekistonda qariyb 25 yil davomida amalda yopiq va kuchli senzuradan ozodlikka chiqqan matbuot barchani esankiratib qo‘ydi. Avvaliga jurnalistlar tajribasizlikdan qiynalgan bo‘lsa, davlat va hokimiyat organlari ular tomonidan ko‘rsatilgan achchiq haqiqatni hazm qila olmadi”, deb aytdi. U nutqida O‘zbekistonda matbuot erkin emas, so‘z erkinligi yo‘q, deb gapirayotganlarga bu ishlar bir kunda amalga oshmasligini aytdi va bunga tashqaridan turib qat’iy va keskin baho bermaslikni so‘radi. “Rim bir kunda qurilmaganidek, o‘zbek matbuoti ham haqiqiy 4-hokimiyat darajasiga yetishiga hali vaqt kerak va biz buni yaxshi tushunamiz”, — deb fikrini xulosaladi AOKA rahbari.
* * *
May oyidagi “Mehr” operatsiyasida Yaqin Sharqdagi janggohlardan O‘zbekiston fuqarolari qaytarilgani esingizda bo‘lsa kerak. O‘tgan hafta “Mehr 2” operatsiyasi yakunlandi. O‘tgan safar fuqarolarimiz Damashqdan olib kelingan bo‘lsa, bu gal Bag‘doddan keltirildi.
Shavkat Mirziyoyev topshirig‘iga ko‘ra maxsus tuzilgan ishchi guruh Iroq hukumati va UNICEF bilan hamkorlikda Iroqda og‘ir sharoitda qolgan 64 nafar bolani O‘zbekistonga qaytardi. O‘zAning xabar berishicha, “Mehr 2” insonparvarlik operatsiyasi doirasida O‘zbekistonga olib kelingan 39 nafar o‘g‘il va 25 nafar qiz bolaning orasida 14 nafar 3 yoshgacha bo‘lgan hamda ikki nafar ota-onasidan ayrilgan bolalar bor.
Keltirilgan bolalarning aksariyatining ota-onasi halok bo‘lgan yoki Iroq qamoqxonalarida jazo o‘tamoqda.
Eslatib o‘tamiz, prezident Shavkat Mirziyoyev avvalroq Yaqin Sharqdan qaytarilgan vatandoshlarimiz haqida to‘xtalib “Uyat bo‘lsa ham aytish kerak, 156 nafar Suriyaga ketganlar nima uchun ketgan? Kimni izlab ketgan? Tan olish kerak, biz ularga sharoit yaratib bermaganimiz uchun ketgan!..”, degan edi.
“Daryo” yangiliklarini kuzatib boring. O‘zbekiston va dunyo xabarlaridan eng birinchi xabardor bo‘ling.
Izoh (0)